Juullimut ammartagaliortussat toqqarneqarput

Tv-kkut isiginnaartartut nukarliunerusut - aammami uagut ilanngulluta - decembarimi kalaallisut ammartakkamik tv-kkut isiginnaarnissarput qilanaarisinnaanngorparput.

Ukiormanna siusinnerusukkut NunaFonden tv-kkut ammartagaliorusuttunik unammisitsivoq. Tamatuma kinguneranik arfineq-pingasunik siunnersuutinik nassiussisoqarpoq, maannalu aalajangiisussat ajugaasumik toqqaaqqammerput.

Aalajangiisussat ippassaq ataatsimiikkamik suleqatigiit pingasunik inuttallit siunnersuutaat ajugaasutut toqqarpaat - suleqatigiit taakku tassaallutik Maria Motzfeldt, Lars F. Andersen aamma Christian F. Rex.

Siunnersuut ajugaatinneqartoq Nuna Fondenimit nutaaliaasutut, qiimasutut, qaamasutut, neriunnerup nuannersuanik oqariartuuteqartutut minnerunngitsumillu saqqummiunneqarnermigut torrallataasutut oqaatigineqarpoq.

- Nissiaraq niviarsiaraq aamma ilaavoq, juullerpalaarnerillu amerlaqisut, juullip ammartagaanik suliallit ilaat Christian Rex oqaluttuarpoq, taamaattorli juullimut ammartagaq pillugu immikkoortut allat oqaatigiumanagit.

- Maanna aallakaatitassianut 24-usunut najoqqutassiatut allakkat piareerluinnarlugit suliarinissaat aallartippavut. Isiginnaartartulli nukarlerpaat qilanaarunarput, neriuppugullu ilaqutariit sinneri malinnaajumaartut, Christian Rex oqarpoq.

Imarisaa unamminermilu ajugaasup oqariartuutaa ima neriunaateqartigaaq neriussinnaalluta kingorna sumiiffinni allani takutinneqarumaartoq, tassunga ilanngullugit nunat avannarliit.