Juullimut allakkat kingusinaarnavianngillat

Umiarsuakkut timmisartukkullu nassiussanut tunniussivissatut aalajangersakkat eqqortinneqarput, tunniussivissallu kingorna tunniunneqartut apuuffissaminnut apuunneqarlutik. Tele Post taama nalunaaruteqarpoq.
Allattoq Mads Lynge
decembarip 23-at 2009 10:19

Allakkat poortukkallu Nunatsinni timmisartukkoortussat suli apuunneqanngitsut ilaqarput, amerlanerilli Air Greenland ikiortigalugu juullertinnagu apuunneqarsinnaanissaat naatsorsuutigineqarpoq.

Poortukkat 200 kiilut missaanniittut Kitaaniit Kulusummut, Tasiilamut Illoqqortoormiuliaanneqartussallu Tunumi silarlunnera pissutaalluni suli uninngapput, Juullertinnagulu apuussinnaanatik.

Allakkat Qaanaaliaanneqarlutillu Pituffiliaanneqartussat 180 kiilut silarlunnera aamma pissutaalluni uninngapput, silallu pitsanngornissaa utaqqiinnarneqarluni.

Air Greenlandip nalunaarutigaa Kitaaniit Danmarkimiillu poortukkat Upernaviliartut sapaatip-akunnera kingulleq tunniunneqarsimasut 400 - 500 kiilut missaanniittut, Juullillu kingorna aatsaat apuunnissaat naatsorsuutigineqartoq.

Atuisut juullimut nassiussat pillugit apeqqutissaqartut najukkaminni TELE-POST Centerinut saaffiginnissinnaasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq