Juullilernerani ileqqoq ingerlaqqittussanngorpoq
![](/sites/default/files/styles/image_934x467/public/article_images/juleting_630.jpg?itok=phB8Xegl)
Qanittukkut saqqummerpoq ileqqoq nuannarineqaqisoq juullimut tusarnaartitsisarneq, Hans Egede-p oqaluffiani ingerlanneqartartoq ukioq manna taamaatinnaarneqanngujoortoq.
Juullimut tusarnaartitsisarnerup nuannarineqarpallaarnini ajutoorutigingajalluinnarpaa, tassa aaqqissuisuusartut Nuummi Ilagiit Sinniisaasa innnuttaasut oqaluffimmut tusarnaariarniarpassuit inissaqartinnisaat ajornartorsiutigisarmassuk.
Maannakkulli Domprovsti, Ilagiit Sinniisaat kiisalu KNR ataatsimeeqatigiissimaput, tassanilu sillimaniarnermut tunngassuteqartut arlallit aammalu sissuertoqartalernisssaq pillugu isumaqatigiissuteqarsimallutik, taamaalilluni taamaatitsiinnarnissaraluaq pinngitsoortinneqarpoq.
Tamaalilluni ukioq manna juullimut tusarnaartitsisoqassaaq - allaat marloriarluni.
Tamanna pissaaq sapaammi decembarip sisamaani - nalunaaqutaq marlunut tamatumalu kingorna aamma nalunaaqutaq sisamanut, kingullerlumi KNR-radiokkut TV-kkullu toqqaannartumik aallakaatinneqassaaq.
Taama ilisimatitsivoq KNR-mi aallakaatitassanut immikoortortaqarfik, ilisimatitsissutigineqarporlu tusarnaartitsinerit juullikkunni aallakaateqqinneqarumaartut.