Juullikkunni ikuallattoortoqannginnissaa ajornanngitsumik isumagineqarsinnaavoq
Naneruutilli mianersuutinngikkutsigit tamakkuninnga nuannaarutiginninnerput kusanaatsumut saatinneqariaannaasarpoq.
Qulliit tungujortut biilinit aappaluttunit ikittaartut, baaboo baaboo imaaginnavissut nunarsuatsinni tamarmi juullikkunni takornartaaneq ajorput. Immaqa naneruutit pisuullutik ikuallattoqarnerani qamiteriartortut.
Taama pisarnerit Nunatsinni aamma takornataanngillat.
- Juullikkunni naneruutit igalaat saaviniitinneqartartut amerlisarput. Mianersuutigineqartussaavoq naneruutit igalaat saaviniitinneqartut saajullu eqqaaniisinneqartut, tassami suiallanniguulluunniit pilersissinnaava ikuallattoorujussuarneq.
Kommuneqarfik Sermersuumi qatserisartunut sillimaniarnermullu pisortaq, Knud Petersen taama siunnersuivoq.
Igalaat saavini naeruutit, sapaassuarnilu naneruuserlugit ningaliliat orpiillu ikuallalerneranni qanoq iliortoqarsinnaasoq, Knud Petersenip ima siunnersorpaatigut.
- Orpik naneruutaannarnik pinneqarsineqarsimappat, taava iluaqutaassaaq siparnimik imermik immalimmik orpiup eqqaaniititaqarnissat. Orpik ikuallalissagaluarpat taava assannik orpik seqqitsarlugu siparni imermik imalik tamaat ataatsikkut kuinagu, orpik ikuallattoq qaminneqarsinnaavoq. Aamma seqqitsaammik imermik pujoralaasanngortitsisartumik piareersimatitsisarnissat pingaaruteqarpoq. Sodavandi aamma qamiterutigissallugu ajunngilaq, taannami kulsyreqarami aalateriarlugu seqqitsaatigineqarsinnaalluarpoq, Knud Petersen siunnersuivoq imalu nangilluni.
- Ikuallanneq annertuseriataassagaluarpat pingaaruteqarpoq inip qimannginnerani matut marluinnaasa matoorarnissaat, taamaaliornikkut ikuallanneq sumut tamaannga siaruaatissanngilaq.
Nunatsinni qatserisartoqarfinni tamani maanna ileqquulersimavoq, suliffeqarfinni aammalumi angerlasimaffinni ikuallattoqartillugu qanoq qatserinissap ilinniartsissutigineqarneri. Qatserinermilu atortut ilaat, suliffeqarfiit iluisa igaanni nivigatinneqartartut aappaluttunik qalipaatillit qatserutit, qanoq atorneqarnissaat ilinniartitsissutigineqartarlutik.
- Qatserutit aappaluttunik puullit qanoq atorneqarnissaat, nalunaaquttap akunneri sisamaannaat atorlugit ilinniartitsissutigisarpavut, taamaalioreernermi qatserutit taakku atorlugit ikuallanneq qaminneqarsinnaasarpoq, ingammik qatserutit qanoq atornissaat qanorlu atorneqannginnissaat ilikkaraanni.
