Juullikkunni aallakaatitassat nuannersut
Radiomi unnugu qulit qaangerlugu tanneq sisamaniit unnuaru marluk qeqqata tungaanut juullerpalaartumik aallakaatitsissaagut, 'Poortuiutaa' aallakaatissagatsigu Hjalmar Berglund Karline Platou aallakaatitsivimmiittoralugit.
Aqagu juulliaqqami ulloqeqqata qeqqaniit ulloqeqqanut Salomine Tobiassenip domprovst Isak Davidsen pulaartigissavaa, meeqqallu orpiliarnerat ualikkut marluk qaangerlugu tanneq pingasut aallakaatissavarput, tassani ilaatigut KNR-ip Qupannavaatai peqataajumaarput. Ualikkut tallimanut Ilulissaniit naalagiarneq aallakaatinneqassaaq.
Juullerujussuup ullaatungaa silatangiaanermik aallarnissavarput, tassani siullerpaamik Nuummi Annaasisitta Oqaluffiata silataani radiokkut silatangiaatitsissaagut, taannalu unnukkut qulip qeqqanut aallakaateqqikkumaarparput. Juullerujussuup ulluanissaaq arfineq pingasunut Annaassisitta Oqaluffianit naalagiassaagut.
TV-kkuttaaq juullerpalaartunik aallakaatitassaqarpugut.
Aqagu 'Inuit' juullimut inuulluaqqussutaat unnukkut arfineq pingasut qaangerlugu tanneq tallimat aallakaatissavarput, ukiutoqqamilu ualikkut sisamat qeqqa aallakaateqqissallutigu.
Juullip ulluisa aappaanni Qeqertarsuarmi erinarsoqatigiit 'Nikanaq' Qeqertarsuup oqaluffiani juullimut tussiaqattaartut unnukkut arfineq pingasut qeqqanut aallakaatissavarput.
Nipilersortut tussiaqattaartullu kisiisa aallakaatissanngilagut, allanimmi aamma aallakaatitsissaagut.
Sisamanngorneq decembarip 30-ani unnukkut arfineq pingasunut ukiutoqqamilu ualikkut pingasut qeqqanut nipilersoqatigiit Sumekkut eqqaamasalikkersaassapput. Tusarnaartitsinernit immiussanik takutitsisoqassaaq, Aqqaluk Lynge, Peter Frederik Rosing Karsten Sommer-ilu eqqaamasalikkersaassapput.
