Juulli aputilik ilimanarsiartorpoq
Tassami Danmarkip annersaani ullumi apineroqqimmat tamanna ilimanarnerulerpoq. Tappavani sumiiffinni arlalissuarni persersorsuusimavoq, aamma politiit Jyllandip Kujataani kujasinnerusortaanilu, Kangisinnerusortaanilu kiisalu Lolland-Falsterimi pisariaqanngitsumik bilinik angalanissaq pinaveersaaqquneqarpoq. Aquusineq sumi tamaani quasattorujussuusoq nalunaarutigineqarpoq.
Aqqusinermi ajutoortunut orniguttartut Falck-it, 3.000-inik sinnilinnik suliassaqarsimapput, ilaatigut bilinik aqqusernup sinaani ingerlariaqqinneq sapilersunut aallariarnerlu sapilersunut ikiuukkiartorlutik.
Jyllandip kangisinnerusuaniittut politiit aputikkoorsinnaajumallutik sakkutuunut ikiortiserinnissimapput. Jyllandip kangisinnerusuani sumiiffiit ilaanni ualimut ima persertigaaq, allaat ambulancinut ingerlaniarneq ajornarsipajaarluni, taamaattumik politiit, sakkutuut qamussuinik PMV-nik taaneqartartunik, ataatsimut tassilinnik assakaasulinnik sisamanik pissarsiniarsimapput.
- Taamaattunik assakaasulinnik sisamanik attartorpugut, taakkulu illoqarfinni Århusimi, Randersimi, Grenaami, Odderimilu piareersimatinneqassasut Jyllandip Kangiatungaani politiini pigaartoq nalunaarpoq.
