Juullerpaluttumik isiginnaartitsilersut
Norgemiut oqaluttualiaat juullerpaluttoq Sanasoq Nissiararlu Norgemi meeqqat juullilernerani pinngitsoorsinnaanngilaat. 1972-imimi oqaluttualiaq TV-kkut isiginnaagassianngortinneqarmalli ukiut tamarluinnaasa Norgemiut meerartaasa isiginnaartuartarsimavaat, tassalu nunatsinnut maanna apuussimariarmat oqaluttualiaq kalaalerpaluttunngorsariarlugu Nunatta Isiginnaartitsisarfiata isiginnaartitsissusiaraa, tassalu juullip tungaanut nunatsinni illoqarfinni arfineq pingasuni isiginnaartitsissutigineqassalluni.
Isiginnaartitsissummi juullerpaluttumi sanasoq nissiararlu naapikkamik inuunerminnik taartigiinniarlutik isumaqatigiipput, sanasullumi nissiaqqap nasaa atiniariaraa sorpassuarnik pisoqarpoq.
Isiginnaartitsissummi isiginnaartitsisartutut ilinniartunngorlaat siullerpaamik peqataassapput. Isiginnaartitsisartunngorniammi tallimat Nuummi Nunatta Isiginnaartitsisarfiani ilinniartutut siullerpaajusut perngaammik isiginnaartitsisussanngorput, taakkulu nissiaraasaassanerisa saniatigut isiginnaartitsisartutoqanngortut Else Danielsen aamma Makka Kleist peqataassapput.
Isiginnaartitsissut Ilulissat Kultoorikkut illorsuanni Sermermiuni novembarip 16-iani takuteqqaarneqassaaq, tamatumalu kingorna Kangaatsiaq, Aasiaat, Sisimiut, Narsaq, Qaqortoq, Paamiut kiisalu Nuuk tulleriaallugit isiginnaartitsivigineqassallutik.
