Juullerpalaarneq avaanngunarsisoq
Pisimasoq sapaatip akunnera kingulleq pingasunngornermi Paamiuni pivoq. Angutit inuusuttut marluk aalakoorlutillu ikiaroortut nalaatsornerinnakkut inissiarsuit ilaanni init arlaannut iserput. Iseramik angutit isersimasut marluk unatarlugit aallartippaat.
Tamatuma kinguneranik unatarneqartut ilaata kigutai arlallit katapput. Isersimaqataa alla aamma unatartippoq pingajuat qunusaarneqarluni. Sisamaat qunusaarlugu anisippaat ujarlertillugu inissiarsuarmi tassani inimi sorlermi ikiaroornartorsisoqarsinnaanersoq misissortillugu naak nalugaluaraa sumi ikiaroornartorsisoqarsinnaanersoq.
Paamiuni politiit oqaluttuaraat angutit sisamat inissiami isersimasut persuttaasunut attuumassuteqanngikkaluartut. Persuttaasut nalaatsornerinnarmi inissiaq isersimaffigisaat iserfigisimavaat.
Angutit inuusuttut marluk kingunitsianngua inissiamit anisimapput. Unnukkut angutip aappaa tigusarineqarsimavoq aappaalu aqaguani tigusarineqarluni.
Taakku tamarmik januarip 20-iata tungaanut tigummigallarneqarput unnerluunneqassallutik persuttaasimasutut, angerlarsimaffimmi eqqissiviilliortitsisimasutut, qunusaarisimasutut kiisalu pinngitsaaliillutik iliuuseqartitsisimasutut.
