Juulip qaammataa aatsaat taama kiatsigisoq
![Qaqortumi naasut kusanallaaraat.](/sites/default/files/styles/image_934x467/public/webform/naasut.jpg?itok=tJj841zs)
- Ukioq manna juuli nunarsuup oqaluttuarisaanerani uuttortaatit atorlugit nalunaarsuisalernermi aatsaat taama kiatsigisimatigaaq, silap pissusianik Nasami ilisimatuut nuimanersaasa ilaat Gavin Smith, qarasaasiatigut attaveqaqatigiittarfikkut Twitterikkut ilaatigut allappoq.
Juulimi agguaqatigiissillugit 0,84 gradinik nunarsuarmi pisarnermit kianneruvoq, tassa 1950-imit 1980-ip tungaanut agguaqatigiissillugu kiassusaanut taama kiannerusimatigilluni. Siorna piffissap taamaalineranut naleqqiullugu 0,11 gradinik kiannerusimavoq, nunarsuup oqaluttuarisaanerani taamani aatsaat taama kiatsigimmat.
Qaammatit kingulliit qulit tulleriissillugit rekordiliisoqartoq Nasap nalunaarutigaa, juulili qaammatini kiannerpaasarmat nunarsuarmi ataatsimut isigalugu aatsaat taama kiatsigaaq.
Taama kiatsiginera inuit pilersitaralugulu, Manerassuup ilaani immap pisarnermit kissarneruneranit, tassa kiattup sarfarsuata El ninop pilersitaanit kissarneruneranit pisoq nassuiaatigineqarpoq.
Nunarsuarmi ataatsimut isigalugu aatsaat taama kiatsigilersimassasoq ukioq manna maajimi maluginiarneqalereersimasoq Gavin Smithip, Nasameersup, oqaatigaa. Twitterikkummi taamanikkut allaaseraa nunarsuup aatsaat taama kiatsigilernissaa ilimanarluinnartoq, siulittuutaalu eqquuppoq:
- Paasissutissat juulimut tunngasut maanna saqqummiunneqarput, 2016-illu nunarsuup oqaluttuarisaanerani aatsaat taama kiatsiginissaa ilimanarluinnarpoq, Gavin Smith oqarpoq.
/ritzau/