Juni nunatta annersaani kiassiortoqarpoq - Nuummilu.Assi: KNR

Silassamik missingersuut: Juulimi sila allanngorarnerussaaq

Nunarput aputaarutiaarluni ukioq manna kissajaarpoq. Aasap silassaa qanoq issanersoq silasiortunut aalisarnermillu inuussutissarsiuteqartumut tipisiorparput.

Nuuk, sinerissami sila assigalugu, piffissami matumani aasarpalaarpoq. Aputaarutiaarlunimi sila unerisimalluni allanngujaalluni kiaqattaarmat, Maniitsumi aalisartumit maluginiarneqarpoq.

- Maajinnguinnartoq malunnarsivoq sila allanngorarpianngitsoq. Taavalu siornarnit kianniarnerulluni. Siorna nillernikuunermik juuni tikillugu, Svend Heilmann oqarpoq.

Silallu atoruminarnera aalisartutut piniartutullu inuussutissarsiuteqartunut iluarsimavoq.

AAMMA ATUARUK Nunatsinni assilisaq nunarsuaq tamakkerlugu uitsatigineqartoq

- Sapernusaqattaarpallaarata pivugut. Iluartorujussuuvoq, Svend Heilmann oqarpoq

Aalisartunut piniartunullu silagissiuinnarnissaq neriorsuutigineqarsinnaanngilaq, silasiortummi siulittuutaat naapertorlugu aasap ingerlanerani sila allanngoratarsinnaavoq.

- Soorluuna juulimi silassaq juunimit nikerarneruniartoq, Lisette Grenbom oqarpoq, nangillunilu. Juulip qaammaataa imaassinnaavoq siallertarlunilu naqitsiniisaffeqartoq.

Aggustimi nillernerusinnaavoq

Ukioq manna upernajaarnerummat aasap ingerlanerani sila allannguuteqarnissaa Svend Heilmannimittaaq ilimagineqarpoq.

- Imaassinnaavoq upernaaq siusinnerusukkut takkuteriarmat juulip naalernerani aggustimilu takkuttartoq, sialuk kujasimmillu anorlikujuk, imaassinnaavoq aamma siusinnerukkut takkuttoq. Naluara, pissanganassaaq taanna, Svend Heilmann oqarpoq.

Nunarpulli isorartoqimmat sumiiffinni aalajangersimasuni silassaq kiannerujumaarpoq.

- Kalaallit Nunaata kangiani aggustimi panernarnissaa kiannissaalu maajimisut issasoq ilimanarpoq, Lisette Grenbom oqarpoq.

Kitaanili aalisarnermik piniarnermik inuussutissarsiuteqartoq silagissiortuarallarnissamik suli neriuuteqarallarpoq.

- Una juunip ingerlanera allaannginnami qanga juuli. Tassa taamaammat, tuttuniarfinnguleraangat kujasimmik  anorlilerajuttarpoq siallilerluni. Ukioq manna qanoq issanerpa. Siusinnerussanersoq naluara. Neriunniarta taamaarujuuginnarallassasoq, Svend Heilmann oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat