Juulimaap biilii kissattoorlutik unittut, orpiliarlu ikinngitsoortoq
Nunatta sineriassuani meerarpassuit sapaassuarmi juullip inua, juullillu orpiata ikinnera alutorsaatigisaqaat.
Qaqortumi juullip inuia pisarnermisut qatserisartut biiliinik 1970-ikkornisanik illoqarfimmi orpiup ikinnginnerani angallatigisartakkaminik angalaarpoq.
Taannali orpiliamut apuutinngitsuungajakkunarpoq, tassami juulimaap biilii nillusaammigut ajornartorsiulerlutik pujuliulerput, juulimaarlu biiliniit niusariaqarluni.
Tusarfik: Kaya Riis.
- Soorunami juullilermat orpiup ikinnissaanut atatillugu nissimaaq illoqarfimmi kaajallaakkami. Taava illoqarfimmut kaajallaanerani nissiaqqat immaqa arlaatigut qinngasaarisimassapput, taamatut pasitsaapparput, Otto Kielsen, upalungaarsimanermut pisortap tullia KNR-imut oqaluttuarpoq.
Qatserisartulli arlalinnik biileqarallartillutik juulimaaq orpiup ikinnginnerani orpimmut apuussinnaasimasoq taassuma ilanngullugu oqaatigaa.
Sisimiuni Juullip inuata orpik ikissinnaanngikkaa
Sisimiunili juulimaaq biilimini ajornartorsiunngikkaluarluni taassuma orpik ikissinnaasimanngikkaa, Qeqqata Kommuniani pisortaaneq, Juliane Henningsen Heilmann oqaluttuarpoq.
Innuttaasulli saammarsarneqarsimapput.
- Kukkusoqarsimaneranik ajornartorsiortoqarneranik ilisimatinneqarput. Aamma nuannersunngulaarlugu nissiaqqat qinngasaarisimasut nassuiaatigineqarpoq. Taamaammat neriuppunga innuttaasut qilanaarfipput sapaatiuppat takkuffigiumaaraat. Aamma meerarpassuit ilaqutariippassuillu ulloq taanna pingaartorsiutigisarmassuk.
Sisimiuni inuppassuit meerarpassuillumi orpiup ikinnissanut najuukkiartoraluarput. Orpillu ikinneqanngitsoorluni najuuttut angerlakaaqqipput.
Tamanna teknikkikkut kukkuluttortoqarneratigut innaallagiamik pilersuineq ajutoortoq kommunip nassuiaatigaa.
Sisimiuni illoqarfiup orpia sapaassuit siullianni ikinngitsoortoq
Orpiuk ikissinnaannginnera peqqutigalugu oqalogiarnerit aliikkusersuinerillu tamarmik adventip sapaataasa aappaannut kinguartinneqarput.
- Soorunalimi tamatta inuinnaavugut aamma kukkusoqarsinnaasarpoq, tullissaani tassunga upalungaarsimaneq eqqarsaatiginerusariaqassavarput, kisianni tassa taamatut pisoqarpoq tullianimut ilinniarfigiinnarumaarparput.
Sisimiuni illoqarfiup orpia adventip sapaataasa aappaanni nalunaaqutaq pingasunut ikinneqassaaq.
Sisimiuni sarfalerisut Facebookimi quppernerminnut ilanngullugu oqaatigaat adventip sapaataasa aappaanni orpik ikinneqarpat meeqqanut kakaaveqassasoq, inersimasunullu gløggeqarumaartoq akeqanngitsumik.