Juulimaap allakkerivia takornariaqartitsisut akisussaaffigilissavaat

Juulimaap allakkanik nakkartitsivipiluunersua Nuutoqqamiittoq nuimanerulissaaq. Ilaatigut tamakkuupput Nuummi takornariaqartitsiviup Nuuk Tourism-ip ukiortaamiit Juulimaap allakkerivia akisussaaffigilerpagu pilersaarutaasut.

Juulimaap allakkerivia ukiorpaaluit matuma siornali aallartikkami Namminersornerullutik Oqartussanit minnerusumik annerusumilluunniit tapiiffigineqartarsimagaluarpoq, Namminersornerullutilli Oqartussat tapiisarnerigaluani qangali unitsippai.

Kingorna Tele Greenlandip akisussaaffigilerpaa, suliffik ”Santa Claus of Greenland Foundation A/S”-imik atserlugu, maannali aamma taanna tunuarpoq.

Nuuk Tourism-ip maanna upperaa, juulimaaq Nuumminngaanneersuuneraraanni tamanna takornariaqarnikkut ajunngitsumik kinguneqartitsisinnaassasoq.

- Suleqatigiissitanik pilersitsissaagut, taakku juulimaaq pillugu suliami qanoq ilillutik takornarianik amerlanerusunik tikittoqarnissaanik imminullu nammassinnaalluartumik suleriaqqinnissamik kivitsiniartussaassapput.

Aningaasartuutissallu tassunga tunngasut juulimaap allakkerivianiit matussuserneqartassapput, Nuuk Tourism-imeersoq Flemming Nicolaisen oqarpoq.