Justus Hansenip ilaquttani salliutillugit Inatsisartunut ilaasortanngoqqinnissaminut qujaannarpoq

Justus Hansenip Tasiilameersup Jens B. Frederiksen kingoraarlugu Inatsisartunut ilaasortanngortussanngoraluaruni ilaquttani salliutillugit qujaannarpoq. Nunatta isorartunerujussua pissutigalugu Tunumiut inuusuttaasa Inatsisartunut ilaasortaanissaannik ajornakusoortitsipput.

Tasiilamit ungasinnerujussua angallannikkullu pissutsit ajornakusoorluinnartut pissutigalugit, Justus Hansen Inatsisartunut ilaasortaanissaminut qujaannartariaqarsimavoq. Ilaquttani qaammaterpassuarni qimaqqasarnissaat akueriuminaatsissimavaa.

-Ilaquttakka politikkimit sulinermit salliutinneruakka. Aalajangerniarneq imaannaanngitsuuvoq, uannulli ilaquttakka pingaarnerupput. Kingullermik Inatsisartunut ilaasortaanera ilaquttannut tunngatillugu imaannaanngitsuusimavoq, tamannalu kingumut aqqusaaqqikkusunngilara, Justus Hansen knr.gl-imut oqaluttusarpoq.

Utoqqamaajunerusullu meerartaqanngitsut Nunatsinni isorliunerusuneersut qinikkatut sulisuupput, tamannalu tamat oqartussaaqataanerannut akornutaasinnaavoq. Qinikkatut suligaanni assersuutigalugulu Tasiilami najugaqartuulluni, taava Inatsisartut ataatsimiinnerini qaammaterpassuarni atasuinnarmik angerlarsimaffik qimaqqasariaqartarpoq ungasinnerujussua aammalu angallannikkut periarfissat ajorpallaatut pissutigalugit.

-Nuummi inissiamik nassaarsinnaassagunaraluarpunga, kisianni Tasiilaq asaqaara ilaquttakkalu aamma tassani nalunngisarpassuaqarput. Taamaammat imaaliallaannarluni tamakku qimatsissinnaanngilakka politikkikkut anguniagaqarnera pissutigiinnarlugu. Taamaammat nuna tamakkerlugu politikki peqataaffiginiarnagu ilaquttakkali illoqarfigisaralu salliutinniarlugit toqqarpara, Justus Hansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat