Justus Hansen: Sikaritsit kimmivikuinik utertitsisoqarsinnaanngortalerli

Justus Hansenip sikaritsit kimmivikuinik utertitsisoqartalernissaata pitsaaqutaanik ajoqutaanillu misissuisitsisoqarnissaanut inatsisissatunut siunnersuutaa marlunngormat siullermeerinninnermi saqqummiunneqarpoq.

Siunnersuut akuerineqassappat misissuineq Inatsisartut aappaagu ukiaanerani ataatsimeeqqinnissaasa tungaannut naammassineqareersimassaaq. Partiit allat siunnersuummut tunngaviusumik tapersiipput.

Justus Hansenip, Demokratineersup, pujortartartut sikaritsit kimmivikuinik aqqusinermut pinngortitamullu igitsiinnartarnerat qatsuppaa. Takussunarput, pinngortitamut ilimagisatsinnit annertunerujussuarmik mingutsitsisartut, taanna isumaqarpoq.

- Sikaritsit kimmivii plastikkeeqqanik kigaatsuararsuarmik nungujartortartunik akoqarput. Taakku immamut mingutsisinerpaajusartut ilagaat, aamma aalisakkanit timmisanillu nerineqartarput, Justus Hansen siunnersuummini allappoq.

Taamaattumik puiaasakunik utertitsisarnitsitulli sikaritsit kimmivikuinik utertitsisalissasugut siunnersuutigaa.

- Sikaritsit kimmivikui ataasiakkaarlugit, kiilukkaarlugit allarluinnarmilluunniit aaqqiissuteqarnikkut soorlu kommunit eqqaaveqarfissuinut utertitsisoqartalersinnaavoq. Tamatumanilu allaffissornikkut isumagisassat annertoorujussuusinnaasut ilisimavara, ajornartorsiulli iliuuseqarfigisariaqarparput, Justus Hansen KNR-imut oqarpoq.

Siunnersuutaali akuerineqassappat sikaritsit kimmivikuinik utertitsisarnerup atuutilersinneqarnera pujortartartunit nammineq akilerneqartariaqarsoraa. Tassa sikaritsinut akitsuutit qaffannerisigut. Qanorli annertutigisumik qaffaavigineqassappat?

- 10 imaluunniit 20 koruuniusinnaavoq, Inatsisartunili iliuuseqarfigisinnaaqqullu  Naalakkersuisunit isummerfigeqqunarpoq.

Meeqqat pissakinnerusullu kimmivikunik katersisut

Sikaritsit kimmivikuinik utertitsisarneq atuutilersinneqassagaluarpat meeqqat pissakinnerusullu kimmivikunik katersisalernissaat Naalakkersuisut ernumatigigaat, Kim Kielsen siunnersuummut akissuteqaammini allappoq.

Taassuma ajornartorsiutip aallaaviata misissorneqarnissaa siunnersuutigaa, tassalu eqqagassat eqqaaviillu nalinginnaasumik ajornartorsiutigineqarnerisa ukkatarineqarnissaat.

Taamaammat kimmivikunik utertitsisalernissamut misissuisitsisoqarnissaa siunnersuutaareersoq allanngortillugu kimmivikut aqqusinermiittut pinngortitamiittullu ikilisinneqarnissaannut allanik suliniuteqartoqarsinnaaneranik misissuisitsisoqarnissaa Naalakkersuisunit kissaatigineqarpoq 

Partiit allat siunnersuummut soqutiginnipput, oqallisigineqaqqeqqaarnissaali amigaataasoraat. Taamaammat Inuit Ataqatigiit, Partii Naleqqap Demokraatillu siunnersuut eqqissisimatitsinermut avatangiisinullu ataatsimiititaliamut suliassiissutigaat.

Sikaritsit kimmivikui ajornartorsiutaangaatsiartut

Inuit Ataqatigiit Justus Hansenimut tunngaviusumik isumaqataapput. Taakku kimmivikut nunatsinni ajornartorsiutaangaatsiarsoraat. Taamaammat Inuit Ataqatigiit siunnersuut naleqquttuusoraat, Naalakkersuisulli ukiaru tulliani ataatsimiittoqarnissaanut utertitsisarnermut aaqqissuussinermik allanillu suliniutaasinnaasunik misissuisoqarnissaanut allannguutissatut siunnersuutaat aamma isumaqatigaat.

Jens Napaattuup, Partii Naleqqameersup, Namminersorlutik Oqartussat inuit igitassaannut akisussaaffilerujussuarnissaat aamma ernumanartoqartippaa.

- Namminersorlutik Oqartussanut akisussaaffiliiginnarsinnaanngilagut, innuttaasunut ataasiakkaanut paasinninnermik akisussaaffimmillu pilersitsissaagut, Jens Napaattooq siunnersuummut oqaaseqarpoq.

Siverth K. Heilmannip, Atassummeersup, siunnersuut aamma isornartoqartippaa.

- Siunnersuut atuarakku meeqqat kimmivikunik katersisut utertitsisullu takorluulerpakka. Taamaattoqarnissaa kissaatiginngilara, Siverth K. Heilmann oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat