Inatsisartut Sanaartornermut Ataatsimiititaliaata siulittaasorisimasaata, Justus Hansenip, KAIR-ip aningaasanik attartoqqilersaarnera isumanerluutigisorujussuuaa. Assi: KNR / Malik Brøns

Justus Hansen: Mittarfissualiornernut aningaasaqarnermik aallaqqaataaniilli aqutsinerluttoqarpoq

Nuummi Ilulissanilu mittarfissualiornermut aningaasaqarnermik aallaqqaataaniilli aqutsinerluttoqartoq, Sanaartornermut Ataatsimiititalip siulittaasorisimasaa Justus Hansen isumaqarpoq. 

Akisungaatsiartumik Inatsisartut Sanaartornermut Ataatsimiititaliaannut kissaateqartoqaqqammerpoq:

Tassa Kalaallit Airports International A/S (KAIR), Naalakkersuisoqatigiiunnaaqqammertut akuerisaannik, Nuummi 2023-imi naammassineqartussamik Ilulissanilu 2023-mi naammassineqartussamik mittarfissualiornernut 900 millionit koruuninik attartugassarsiorsinnaanissamut kissaateqarput.

Aningaasat taakku nunatsinni peqqinnissarfimmut ukiumi ataatsimi aningaasartuutaasartut 67 %-it misseripajaarpaat.

AAMMA ATUARUK Tusagassiuutit: KAIR mittarfinnut atugassanik milliardingajannik saniatigut atorusuttoq

- KAIR 900 millionit koruunini attartugassarsiorsinnaalersimasoq uppernarsarsinnaavara. Aningaasallu taakku qalarnanngeqisumik atorneqassasut tamatuma kingorna aamma ilisimatinneqarpugut, Sanaartornermut Ataatsimiititaliap siulittaasorisimasaa Justus Hansen Demokraatineersoq KNR-imut oqarpoq.

Kalaallit Airports International A/S-ip aningaasaqarnera

Nuummi Ilulissanilu mittarfissuassat Namminersorlutik Oqartussanit danskillu naalagaaffianit aningaasanik Nationalbankenimit Nordisk Investerings Bankenimillu atornikkut pigineqarput.
 

Namminersorlutik Oqartussat: 1,400 mia. kr.
Naalagaaffik: 700 mio. kr.
Nationalbanken (taarsigasseeqqinneq): 450 mio. kr.
Nordisk Investerings Bank (atorneq): 450 mio. kr.

Katillutik: 3 mia. koruunit.

Sanaartornermut Ataatsimiititaliaq mittarfissualiornerit pillugit ataavartumik paasissutissiivigineqartartoq, taanna ilisimatitsivoq. KAIR-illu aningaasanik attartugassarsioqqissinnaanissaa siusinnerusukkut eqqartorneqareersimavoq. 

Sanaartulereernermimi ilimagisamit aningaasartuuteqarnerusoqartariaqartarnera qaqutigoortuunngilaq. 900 millionit koruunilli ataatsimiititaliap attartugassat amerlassusissaattut naatsorsuutigisaanit amerlanerujussuupput.

Tamanna aningaasaqarnermik aallaqqaataaniilli aqutsinerluttoqarsimagunarneranik soorunami ersersitsivoq, Justus Hansen oqarpoq.

Mittarfissualiortoqarnera tapersersoraa

KAIR-illi aningaasaqarnera suli patajaatsuusoq Namminersorlutik Oqartussallu aningaasanik attartoqqinnissamut qularnaveeqqusiissanngitsut, ineqarnermut attaveqarnermullu maanna naalakkersuisuugallartoq Karl Frederik Danielsen (S) tusagassiuutinut nalunaarpoq.

Naatsorsuutigisamit amerlanerujussuarnik aningaasartuuteqarfioqqittussaagaluartut, Justus Hansenip mittarfissualiornerit aamma 1 milliardit koruunit pallillugit attartoqqinniarneq tapersersorpai. Inuttaatami mittarfissualiornissanut Sanaartornermut Ataatsimiititaliami akuerseqataasimanini usorsisimaarutigaa.

Mittarfissualiornerillu nunatsinni tamarmi aningaasaqarnermut iluaqutaassasut, nalunaarusiami saqqummersinneqaqqammersumi aamma erserpoq.

- Mittarfissualiornissanut atsiornikuunerput, aamma mittarfissualiornerit ingerlalluarlutillu taakku innuttaasut aningaasaqarnerannut iluaqutaanerat isigigaanni, mittarfissualiornerit iluatsilluarput, Justus Hansen oqarpoq.

AAMMA ATUARUK Ilisimatuut: Mittarfissuassat atulerpata Kalaallit Nunaata aningaasaqarneranut iluaqutaassapput

Aningaasat taakku suminngaanniissanersut, Justus Hansenip oqaatigisinnaanngilaa. Nunatsinnili inuit ataasiakkaat qanorluunniit pisoqaraluarpat akiliissasut, taassuma aarleqqutigaa.

- Taamaammat Sanaartornermut Ataatsimiititaliaq tamatumani alaatsinaanneroqqullugulu innuttaasunut tamanna pillugu qaammarsaanerunissaanik kaammattorparput. Inuimmi aningaasaataat uani pineqarput.

Nuummi mittarfissualiorneq 2023-p naanerani Ilulissanilu mittarfissualiorneq 2024-mi naammassissangatinneqarput.

Qaqortumi qaqugorpiaq mittarfiliortoqalissanersoq ilisimaneqanngikkallarpoq. Qaqortumi mittarfiliornissaraluaq siorna ukiakkut kinguarpoq, taannali pillugu aappassaanik januaarimi suliariumannittussarsiortoqarluni. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat