Juntaaq taamani qujavoq
Unnerluutigineqartut illersuisuata illersuinerani, naammasseqqammersumi, assortuuttoqangaatsiartoqarpoq. Nunatta Eqqartussiviani tamanna pivoq. Pappilissat pingaarutillit suliami saqqummiunneqannginnerannut Namminersorlutik Oqartussat inatsisilerituuat isornartorsiorneqarpoq. Pappiliarlu ataaseq suliami pingaaruteqarsimaqaaq.
Inatsisileritooq Jens Christensen, Jess G. Berthelsen-imik illersuisoq, naggasiinermini ima oqarpoq:
- Suut atorneqassanersut taassuma toqqarsimavai. Namminerlu saqqummiinermini iluaqutaasinnaasut kisiisa atorsinnaasutut toqqarsimavai, saqqummiinerminilu ajoqutaasinnaasut pappilissat ilanngussimanagit, Namminersorlutik Oqartussat inatsisilerituuannut, Jesper Müller-imut, isorinnilluni taama oqarpoq.
Mappit angisuut marluk, missingersuutinik, ataatsimiinnernit imaqarnilianik nalunaarsukkanillu, pappilissanik 1500-it missaannik amarlassuseqartunik imallit, Pusi A/S pillugu suliami uppernarsaatitut atorneqarput. Pappilissanilu suliami uppernarsaatitut saqqummiunneqarnerpaasimavoq januaarip 25-ani 2000-imi Puisi A/S-imi siulersuisut ilaatigullu Naalakkersuisut siulittaasuat Jonathan Motzfeldt peqatigalugu ajornartoornermi ataatsimiinnerannit imaqarniliaq. Ataatsimiinneq taanna Puisi A/S-ip akiliisinnaajunnaarnera sioqqutitsiarlugu pivoq.
Jens Christensen-ip oqarnera naapertorlugu Namminersorlutik Oqartussat inatsisilerituuata piumasani pisimasuuppagu pappiliaq taanna eqqartuussinermi uppernarsaatitut atorneqarsimassanngikkaluarpoq.
- Pappiliaq taanna uanga nammineerlunga nassaaraara. Pappilialaavorlu pingaaruteqarluinnartoq, Jens Christensen oqarpoq.
Unnerluutigineqartut illersuisuisa pappiliaq taanna saqqummiukulanerannut peqqutaavoq, pappilissami tassani illersuisut oqaatigisaannik, Puisi A/S-ip matuneqannginnissaa politikkikkut anguniarneqarsimaneranik, takutitsisuummat. Ataatsimiinnermi imaqarniliami ilaatigut ima allaqqasoqartarpoq:
- Naalakkersuisut siulittaasuata Jonathan Motzfeldt-ip siulersuisut tunniutiinnarsimannginnerat nuannaarutigaa. Namminersornerullutik Oqartussat Puisi A/S-imik suliaq kujataani suliffissaaleqineq pillugu tapersersorsimavaa, aammali isumassarsiaq upperisimallugu. Suliani ajutoorsimasuni Namminersornerullutik Oqartussat siullermeerlutik ilaalinngillat, issuaaneq naavoq.
Namminersornerullutik Oqartussallu taama isumaqarsimanerat siulersuisuni ilaasortaasimasut unnerluutigineqartut unnerluutiginnissutaannut sakkukillisaataassasoq, inatsisilerituui isumaqarput.
Puisi A/S-ip akiilissaajunnaarnera siusinnerusukkut pisimasussaanerarlugu unnerluutigineqartut suliami avoqqaarineqarput,
- Naalakkersuisut qullersaannit suliffeqarfiup ingerlaannarnissaannik kissaateqarnermik oqaaseqartoqareersoq, suliap massuma aallartissimanera isumaqanngilluinnartoq oqaqqittariaqarpunga, Lars Emil Johansen-ip illersuisua, Sune Westrup illersuinermini taama oqarpoq.
Namminersorlutik Oqartussat inatsisilerituuata Jesper Müller-ip isornartorsiuineq akuerinngilluinnarpaa, ataatsimiinnermit imaqarniliaq piaaraluni ilaatinniarsimannginneranut oqaaseqaqqikkumanngilaq.
Nunatta eqqartuussisuunerata, Søren Søndergård Hansen-ip, Namminersorlutik Oqartussat akiliisinnaajunnaarnermilu pigisat 22 millioni koruuninik taarsiinissamik piumasaqarnerat, siulersuisuni ilaasortaasimasut unnerluutigineqartut, misissueqqissaartartut pisortarlu HP Barlach Christensen tamakkiisumik akiliissanersut, ilaannaanik akiliissanersut imaluunniit akiliissannginnersut aalajanginnginnerani, Puisi A/S pillugu suliaq aqagu naammassigallassaaq.
