Juntaaq ikinngutinilu piisaapilussimapput
- Tigooraaginnartarfiuvoq. Pisussaavunga Jonathan Motzfeldt naalakkersuisuni siulittaasuutillugu Hans Egedep Illuani pisarsimasut oqaluttuarissallugit. Namminersornerullutik Oqartussat ilassinninnermi viinnit imigassallu atugassaat illumiittut inatsisartuni siulittaasup, nuliata ikinngutaasalu killeqanngitsumik atortarpaat, Anne Sofie Hardenberg aviisimut Sermitsiamut ullumi saqqummersumut oqarpoq.
- Pisartut nuanniilliutigeqaakka. Illumi tassani atuineq qanimut malinnaaffigaara. Nerisassanut viinninullu akiligassat uannut apuuttarput, Inatsisartullu allaffeqarfiannut ingerlateqqittarpakka. Uangami pisiniartuusarpunga. Eqqortoq saqqummerniarli. Neriuppunga angut pineqartoq akiliisinneqarumaartoq. Juntaap oqarneratut kukkunerunngilaq, pissutsilli taamaattuarsimapput.
- Takanna, takanna, takanna. Juntaaq tukkortuuvoq, kisiannili tassa uagut akilikkatsinnik, Anne Sofie Hardenberg, pisooqataasutut misigisarsimasoq Sermitsiami tusagassiortumut oqaluttuarpoq.