Julius Nielsen BBC-p isiginnaagassiaani hollywoodimit tusaamasamut taartaasoq

Isiginnaagassiaq, The North Water nunani allani nunatsinnilu aallakaatinneqartaaleruttorpoq. Isiginnaagassiaq nangeqattaartoq 1800-ikkunni arfannianut tunngassuteqarpoq, tassanilu Julius Nielsen Tasiilameersoq Hollywoodimit isiginnaartitsisartumut tusaamasaanerpaat ilaannut taartaasuuvoq.

Tuluit Nunaanni TV-qarfiup BBC-p nangeqattaartuliaa qarasaasiakkut maanna isiginnaarneqarsinaavoq. BBC-p nangeqataartuliaa inuppassuarnit malinnaaffigineqartoq, Issittumi ukiuni hunnorujulikkaani siuliini arfanniartarnermut tunnngavoq.

Isiginnaartitsisartoq nunani tamalaani tusaamasaq Colin Farrell inuttaasuusaartunut ilaavoq, tassungalu Tasiilameersoq Julius Nielsen taartaasartuuvoq.

Nunarsuaq tamakkerlugu isiginnaartitsisartuni tusaamaneqarnerit ilaannut Collin Farellimut Julius Nielsen inuttaasuusaarpoq. Julius Nielsen nalaatsornikkut filmiliornermut peqataavoq.

Julius Nielsen filmiliornermi piniartut suleriaasiannik ilitsersuissasoq siunnersuisuussasorlu pilersaarutaagaluarpoq, isiginaartsitisartut filmiliortullu umiarsuarmi najugaqarfigisaannit angallatinik angallattassagai, filmi Norgep avannaani Svalbardimi immiunneqarnerani.

Kisianni filmip immiunneqarfianut tikikkamik Julius Nielsenip pilersaarutigineqartutut suliassai allanngorput - filmiliortitsisup BBC-p piumasaqaatai pillugit.

- Aallareerluta paasivarput BBC-ip piumasarisimagaa taakku tusaamasat suliaqarsinnaanngitsut soorlu uumasunik tunngasunik imaluunniit aattaqartunik. Taava tassani ikkuteriasaarpunga uanga taakkortai suliarissallugit. Hovedrollemik tigummiartoq taava uanga tassunga ikkunneqarpunga. Soorlu puisimik pilanneq taavalu uumasup aavannik attuinissamut uanga taannaasuusaarpunga. Colin Farrellimut tassa taartaavunga tassunnga tunngatillugu, Julius Nielsen KNR-imut oqarpoq.

”Angisoorujussuuvoq”

Julius Nielsen qaammat ataaseq Svalbardimi filmilioqataavoq, sapaaatit akunneri pingasut arfanniat angallataatitoqaata eqqaanni sikkussaaqasumi filmiliortoqarmat angallat taana filmiliornermi qitisututut inississimalluni.

- Misigisassaavoq nuannivippoq, aappaatigut eqqarsarnarpoq taama annertutigisumi sooq nammineq ilaasimalluni periarfissaq taamannak tunniunneqartoq eqqumiilaarpoq, Julius Nielsen oqarpoq.

Julius Nielsen Colin Farrellip inuttaaffigisaatut atisalersorsimavoq.

Umiarsuit pingasut Svalbardip illoqarfiutuarisaanit Longeyarbyenimit aallarput. Umiarsuit tassallutik umiarsuaq najugaqarfiutigisoq, sikusiut aamma arfanniat angallatitoqaat Københavnimeeerwsoq taanna 1800-ikkunni Kalaallit Nunaanni Danmarkimi angalasarsimavoq.

Filmiortoqarnerani inuit 100-it missaaanik amerlatigisut sikumi suleqataapput filmillu suliarineqarnerani amerlanerussuit akuullutik. Filmiliortoqarnerani illup iluani pisuusaartitat Ungarnimi immiunneqarput.

Filmiliami pingaarnertut inuttaritinneqartoq peqqarniitsutut inuttaritinneqartoq pitsaasupilussuuvoq.

Isiginnaagassiami peqqarniitsuusoq ilumoortumilli pitsaasorujussuusoq

Julius Nielsen isiginnaartitsisartoq Colin Farrel assigilerniarlugu akunnerit arfinillit atorlugit kiinaa taninneqarpoq, taakkua angissutsimikkut timimilu ilusaat assigiipput.

Assersiuutigalugu Julius Nielsen ulussap siutillu nalaani umiusalertineqarpoq.

Filmiliami takuneqarsinnaasunut ilaavoq Colin Farrells pusimik pilattoq ilumoortorli tassavoq Julius Nielsen puisimik pilammat.

- 6 tiimi missaani atorpaat, umilersorlunga, tanittorlunga, nujalersillunga. Tassani eqqumiilaarpoq isigisaq, utoqqarujussuartut isikkoqalersillunga. Kisianni kiinara filmiliunngikkaluarpaat, ilaasut tassaniipput assakka, talikka taavalu tununniit, Julius Nielsen oqarpoq.

Nangeqqattaartuliami Collin Farrel affanniatut peqqarniitsutut inuttaavoq, piviusumilli Correl Farrel pitsaasupilussuuvoq.

- Privatimik inuunerani oqaloqatigisinnaasanni filmiliornermi uani sapernannginnerpaavoq oqaloqatigissallugu. Suut tamaasa apeqqutigivai: kinaanersugut, qanoq innersugut, suut suliarinerigut.

1800-kkunniittuusaartitsineq

Julius Nielsen filmilioqataanermini Svalbardimi pinngortitap immikkuullarissuunera tupigusuutigaa.

Assersuutigalugu Svalbardimi qeqertami arfanniat naggueqatigiillu inuit naapinerat filmiliarineqartussanngormat aputeqanngilaq. Taava unnuap ingerlanerani qeqertaq apuutasalersorneqarpoq ullullu tulliani filmiliorput soorlu tassa pivusumik aputilik Julius Nielsen KNR-imut taama oqarpoq.

BBC-ip TV-ikkut nangeqartaartuliaa The North Water Jan McGuiresip atuakkiaa " Nordhavet" aallavigalugu filmiliaavoq, taanna DR-ip nittartagaatigut akeqanngitsumik isiginnaarneqarsinnaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat