Nalinginnaasumik ippassaq ataatsimeersuarnermi naalakkersuisut kissaatigigaluarpaat siulittaasoq Lars-Emil Johansenimik taarserniarlugu, Air Greenlandimili sulisut sinniisaasa ilaasortaatitaasa taarsiiniarneq akerlerimmassuk ullumi tunuarpoq.
Tassa Julia Pars siulittaasunut uteqqippoq, piaartumillu siulittaasut inissitsitissapput.
- Air Greenlandimi suliama ingerlateqqiinnarnissaanut periarfissinneqarama nuannaarutigisorujussuuara. Taamaaliornissannut piareeqqajuaannarsimavunga, Air Greenlandillu suliffeqarfittut aningaasaleerusussuseqartutut niuernerpalaartumillu ingerlanneqarnissaa pillugu iliuusissat pilersaarusiornermi anguniakkat piviusunngortinnissaannut piumassuseqarlungalu nukissaqarpunga, Julia Pars oqarpoq.
Siulersuisut inissitsiterneqarnissaannut Lars Tyberg Danmarkip naalagaaffiata sinniisaa siulersuisuni siulittaasuugallarpoq.