Julie nalliuttorsiorluni saqqummersitseqqilersoq
'Every little part of me is missing you now...'
Julie Berthelsen 2013-imi saqqummersitamini 'Every Little Part of Me'-mi maqaasingaakkani pillugu erinarsorpoq.
Julie Berthelsenilli nipilersugaanik maqaasisaqartut aamma amerlagunarput.
Maqaasinissamulli pissutissaaruppoq, tallimanngorpammi EP-mit aappaagu saqqummertussamit single siulleq saqqummersinneqassaaq, dr.dk taama aallaaserisaqarpoq.
Naliuttorsiornerminut atatillugu EP-liorniartoq
Julie Berthelsenip nuuteeqqamik saqqummersitaa siulleq, ilaatigut 'Every Little Part of Me'-mik imaqartoq aappagu ukiunik 15-inngortorsiussaaq. Taanna 2003-mi saqqummersinneqarpoq nuannarineqartupilussuullunilu aamma Danish Music Awardsimi arlalinnik akissarsitinneqarpoq.
AAMMA ATUARUK Julie Berthelsen singlemik nutaamik saqqummersitsisoq
Ukiunillu 15-inngortorsiorneq pissutigerpiarlugu EP-mik nutaamik saqqummersitsiniarluni aasakkullu tusarnaartitsisaqattaarniarluni erinarsortartup oqaatigaa.
- Saqqummersitseqqinnissamut periarfissaalluarpoq. Nipilersornermi maannamut inuussutissarsiutigiinnarpara, aamma saqqummersitsillattaartapunga naartunerma meeqqamillu paarsinerma akornanni erinarsuusiortarpunga. Ingerlateqqinnissaanulli ulapippallaartarpunga, dr.dk-mut taama oqarpoq.
Tamannali maanna allanngortinneqartussanngorpoq.
- Ukiunik 15-inngortorsiorpunga. Taamaammat suliaqartariaqarpunga. Taamaaliunngitsoorsinnaanngilanga. Aamma pinngitsoorani pisoqarluassaaq.
AAMMA ATUARUK Zednami erinarsortut katersuuteqqilersut
Julie Berthelsen DR P4-mi radiukkut aallakaatitassiami 'Formiddag på 4'eren'-imi ulluinnarni aallakaatitsisartuuvoq. Danmarkimilu kommunimut qinersineq pillugu nipilersukkamik videuliaa maannakkorpiaq aamma takuneqarsinnaalluni.
Julie Berthelsen nuuteqqanik saqqummersitai tallimaapput kingulleq ‘Closer’ 2010-mi saqqummersinneqarluni.
AAMMA ATUARUK Julie Berthelsen radiomi aallakaatitsisartunngulersoq