Julie Edel Hardenberg assilisaminik saqqummersitsivoq

Eqqumiitsuliortup Julie Edel Hardenbergip assinik saqqummersitsinini qulequtalik ”Nipaatsumik assigiingisitaaneq” Kulturikkut Illorsuarmi Katuami ippassaq ammarpaa.

Qulequtarititaminut nassuiaatigaa, inunngorfimmini Nuummi illoqarfimmi pisuttuaraangami inuit misissorlugit, isiginnaarlugit, tunuliaqutaat alapernaaffigisarlugit, taava inuppassuit kalaaliugaluarlutik nuna allamiunut assingusinnaasarmata, italiamiunut, brasiliamiunut Kinamiunut assingusinnaasartut. Julie Edel Hardenbergip soqutiginartippaa, inuit 55.000-it akornannninnaq taama assigiinngissuteqartigisugut. Apeqqutigaarputtaaq kulturit assigiinngistaarneranni suna nuannequtaanersoq, akivorlu:

- Qangali uanga nuannarisarpara soorlu aappaariit assigiinngitsunik tunuliaqutaqarlutik – asannninnerlu aallaavigalugu inuunermik nutaamik pilersitsisinnaammata, taava taassuma aappariinnerup iluani oqaluttuassartaa soqutigisarpara, inuit taakku naak assigiinngikkaluaqalutik sukkut imminnut soqutigilerpat.

Takornartanik Europami uumissuinermut, ammip qalipaataa pillugu immikkoortitsisarnermut, atuakkiaa attuumassuteqarnerpa? Julie Edel Hardenberg isumaqarnerarpoq nipaatsumik assigiingistaaneq nunatsinniinnaq pinngitsoq, kisianni nunarsuarmioqataanermut tunngatillugu eqqartussallugu pisariaqarnerujartuinnavissoq. Assigiinngisitaaneq ilutsinni nunatsinni pigereeripput Julie Edel Hardenberg isumaqarpoq, inussiarnersorujussooreersugut, politikkikkulli eqqartorneqaleraangat silarsuarmut inoqatitsinnullu isiginneriaaserput soorlu annikillisarnerarpaa, inoqatitsinnut asanninnerput ataqqinninnerpullu tunuartoortartoq unnerpaa.

Saqqummersitsinermik Nuummut alakkaasinnaanngitsut, atuagaq 300 koruunilerlugu decemberip aallartinnissaata tungaanut pisiarisinnaavaat. Aningaasaliisussanillu assigiinngitsunik qinnuteqaatigisarsimasani iluatsissappata, atuakkiami assipajaavanik Nunatsinni angerlarsimaffinnut tamanut agguaassisinnaanissani Julie Edel Hardenbergip takorloorpaa.