Julie Berthelsenip cd-liaa nutaaq “Asasara”, ataasinngormat saqqummersoq Danmarkimi assigiinngitsunik nalilersorneqarpoq.
DR-imi allaaserineqarpoq “Shout” aamma “Is a wonderful feeling” nuannarigaanni Asasara naammagisimaarneqarsinnaasoq.
Aviisi Berlingske Tidende ullorissamik ataasiinnarmik tunisivoq, Julie Berthelsenilu taallugu “erinarsortoq naammaannartoq” allapporlu cd “pequtaarniarfimmi BIVA-mi januaarimi akikilliliinermi ilisarnaatitut nipilersuutitassaqqinnerusoq”.
Atuagassiaq nipilersornermik sammisalik Gaffa allappoq cd pitsaasumik suliaanani saqqummersinniaannarlugu saqqummersitaasimasoq.
Aviisi JyllandsPosten cd-mut ullorissanik pingasunik tunisigaluarpoq, erinarsukkalli ilarpassui pitsaannginnerarlugit. Taamaattorli cd-p taaguutaa nuannarineqaqisoq allappoq.