Julie Berthelsen arsaattoqalerpat erinarsussaaq
Danmarkimi arsaattartoqatigiit holdit marluk arsaateqattaarlutik unammiffimmi SAS Ligami arfininngorpat unammilerpata kalaaleq arnaq aliikkusersuisussanngorpoq.
Allattoq Mads Lynge
Arsaattartoqatigiit Vejle Boldklub aamma AaB unammissapput, unamminerullu aallartinngilaataani Julie Berthelsen erinarsussaaq, erinnat pingasut atortussaagamigit.
Julie Berthelsenip erinarsornissaa Vejle Boldklubimut piginneqataasut ilaannit Inventarlandimit tunissutaavoq:
- Vejle Boldklubip ajunngilluinnartumik SAS Ligamut anngunnera nalliuttorsiutiginiarparput, Kalaallillu Nunaanni najugaqarnikuunera takutikkusuppara. Julie Berthelsenillu aliikkusersuinissaa pissusissamisuuginnartutut isigaara, Inventarlandimi tuniniaanermut pisortaq Søren Poulsen taama oqarpoq.