Juliane: Nunaqarfinni akigitinneqartut qaffasippallaaqaat
Ilaqutariinnermut peqqissutsimullu ataatsimiititaliami ilaasortatut upernaakkut ataatsimiinnissami tamannarpiaq oqallisissiatut saqqummiutissamaarpaa.
- Equngasumik inissisimasoqarnera ullumi takusinnaasara isorliunerusormiunut naapertuilluartuliornerunngilaq.
Ajornartorsiut Siumup politikkikkut oqaaseqartartuata, Karl-Kristian Krusep aammalu partiip pilersinneqaqqammersup Partii Naleqqap siulittaasuata, Hans Enoksenip, qaqiligaat isumaqataaffigaa.
Namminerlu siunnersuutigaa isorliunerusuni inuussutissanut kiffartuussinernullu allanut akit qaffasinnerpaaffissaannik eqqussisoqartariaqartoq.
Namminersornerullutik Oqartussat oqaluttuarisaaneranni iluarsartuusseqqinnerit malunniuteqarnerpaat ilagaat assigiimmik akeqartitsinissamik aaqqissuussinerup 2005-imi atorunnaarsinneqarnera. Hans Enoksenip naalakkersuisunut siuttuunerata nalaani nioqqutissanut kiffartuussinernullu nuna tamakkerlugu assigiimmik akeqartitsineq taamani atorunnaarsinneqarpoq.
Assigiimmik akeqartitsinermik aaqqissuussinerup atorunnaarsinneqarnera illoqarfinni umiarsuarnik akulikinnerusumik tikinneqartartuni nioqqutissanik akikinnerusunik kinguneqarpoq, paarlattuanillu isorliunerusuni illoqarfinni nunaqarfinnilu akinik qaffasinnerungaartunik kinguneqarluni.
Qaanaami, Upernavimmi, Illoqqortoormiuni Tasiilamilu akit qaffasinnerpaaffissaannik eqqussisoqarnera kingunerisaanik illoqarfinni innuttaasut amerlanersaasa najugaqarfigisaanni akit qaffassapput.
Sumiiffinni allani akinik qaffasinnerusunik kinguneqarnissaa piareersimaffigiviuk?
- Isumaqarpunga aningaasalersornissaanut periarfissanik allanik nassaartoqarsinnaanngippat tamanna ammaffigineqartariaqartoq, Juliane Henningsen oqarpoq.
