Juliane Henningsenip Naalakkersuisut neriorsuutiminnik unioqqutitsinerarpai
Pingaartumik aalisarnermut politikki eqqarsaatigalugu isummanik allanngortitserujussuarnerit takussaapput. Aalisagartassiissutinik amerlineqarnissaat killeqanngitsumillu aalisarsinnaanissaq eqqartorneqartupilussuupput, maannamulli aalisarnerup tungaatigut pisoqarpiarsimanngilaq.
-Ataatsimut isigalugu Siumup aalisarnermut politikkiat naaperiarfeqanngitsumik sakkortuumillu ingerlanneqarnikuuvoq. Karl Lyberth, maanna Naalakkersuisuusoq taannarpiaasarnikuuvoq nipitunerpaalluni pisassiissutinik ilasiumasuartarnikuusoq. Oqaatigineqartariaqarpoq Naalakkersuisunngortut pissutsinut piviusunut takunnissinnaalersimasut, soorlu oqartarnikuusugut: 'Imaaliallaannaq piumallerlunilu pisassiissutit ilaneqaqattaaginnarneqarsinnaanngillat.' Neriuppunga tamanna Siumukkut paasilissagaat siunissamilu aalisarnerup iluani aaqqissuusseqqinnerit pillugit isumaqatigiilluta suleqatigiinnerulissasugut, Juliane Henningsen nassuiaavoq.