Juliane Henningsenip kalaallit katerisimaartarfiat annaanniarpaa
Tamanna Julianep Christianiami ippassaq paasisassarsiorluni angalaneranit aalajangiunneqarpoq. Café Angakkoq Stjerneskibimi qullerpaami inissisimavoq.
Juliane Henningsen siornatigut Christianiamiittareerpoq, maannali siullermeerluni sumiiffiit assigiinngitsut pulaaqattaarlugit.
- Christiania sunarpiaanersoq susoqartarnersorlu inuillu maani qanoq inuunersut paaserusullugit maannarpunga. Inuit peqqinnerullutik inuunissaaminnik suliniuteqartut takullugit nuanneqaaq. Kalaallittaaq imigassartaqanngitsumik ataatsimooqatigiissinnaanerisa periarfissiuunneqarnerat pingaaruteqarpoq, Juliane Henningsen oqarpoq.
Kalaallit ataatsimoortarfiat najugaqarfiallu Café Angakkoq aningaasatigut tapersersorneqarnissamik isumaqatigiissutip nutarterneqannginnera peqqutigalugu ilungersunartumik inissisimavoq. Tamannali Juliane Henningsenip misissussallugu oqaatigaa.
