Juliane Henningsen taamaatitsiinnarnermut tapersiivoq
Inuit Ataqatigiit sinnerlugit Folketingimut ilaasortaq Juliane Henningsen Iraniliaqataasussaagaluarpoq. Taanna aperaarput Iraniliarnissamik taamaatitsiinnarnerup isumaqatigineraa, ima akivoq:
- Aap. Muuamaamik titartakkat pillugit danskit Iranimiunit utoqqatseqquneqarmata, taakkualu utoqqatsissutigineqaqqaartinnagit Iraniliartoqarsinnaanngitsoq Iranimiunit nalunaarutigineqarnera isumaqatiginnginnakku angalanissarput unitsinneqarnera ajorinngilluinnarpara, Juliane Henningsen oqarpoq, nangipporlu:
- Iraniliarnissaq inuit tamarmik pisinnaatitaaffiinik eqqartuinissamut atorneqarsinnaagaluarpoq, tusagassiorfiillu Danmarkimiittut kiffaanngissuseqartuunerat eqqartorneqarsinnaagaluarami, Inuit Ataqatigiit sinnerlugit Folketingimut ilaasortaq Juliane Henningsen oqarasuaatikkut apersorneqarnermini taama oqarpoq.
Kalaallit Nunaat pillugu Folketingimi oqallinnissamut Juliane Henningsen maanna peqataasinnaanngussaaq, marlunngorpat Folketingimi oqallittoqassagami.