Juliane Henningsen: Sila pillugu ilisimatusarneq pingaarnerutinneqartariaqarpoq

- Isumaqarpunga nunatsinni nunani issittuni pissutsit pillugit ilisimatusarnermi ilisimatusartussanik ilisimatuunillu nunatsinnut tikisitsiniarnitsinni nunanut allanut unammillersinnaanerput pilersaarusiortariaqaripput, Juliane Henningsen oqarpoq.

”Qanoq-una uagut nunatsinni neqeroorniartugut ilisimatuunut ilisimatusartussanullu?” Aperaaq.

- Savalimmiuni maani isumasioqatigiinnerni saqqummiunneqarpoq klimainstitutimik pilersitsinissaq. Uaguttaaq nunatsinni pilersaaruteqareeratta, tassuunakkut unammilleqatigiinnerup aqqani, suleqatigiinnissaq pingaartillugu eqqarsartariaqarpugut maannangaaq, oqarpoq.

Ilisimatusartunut nunarsuarmi allami piumaneqaqisunut atugassarititaasut nunatsinni suunersut nalunnginneqartariaqarsorai.

- Naalakkersuisut aamma aningaasarsiat nunatsinnilu ilisimatusartussanut neqeroorutissat eqqarsaatigisariaqarpaat. Sunaana uagut immikuullarissumik neqeroorutigisinnaagipput? Juliane Henningsen apereqqippoq.

Ilisimatusarnermi nunat issittut ataatsimut aamma ukiuni aggersuni suleqatigiittariaqarsorai.

- Tamanna pingaaruteqartorujussuuvoq.

Savalimmiuni inuussutissarsiutinik ingerlataqartut sila pillugu ataatsimeersuarnermi pilersitaat tassaavoq TransAtlantic Climate Institut. Taanna Savalimmiuni angerlarsimaffeqassaaq, naatsorsuutigineqarporlu ilaatigut sila pillugu ilisimatusarnermut atatillugu suleqatiserinnilluni Kalaallit Nunaannut qaammatip tulliuttup ingerlanerani saaffiginninnissasoq.