Juliane Henningsen qanimut qinersinermut malinnaalluni nuannisarsimaqaaq
Barack Obamap præsidentissatut qinigaasoq nunarsuarmi tamarmiit pilluaqquneqaqattaarpoq, ingammillu inuusuttunit neriuutissaqalersitsisutut isigineqarpoq.
- Isumasiuinerit takutippaat, arlaannik allanngortoqarluinnanngippat, Barack Obama ilumut præsidentinngussasoq, taamaakkaluartoq qularnarunnaariartormat inuit nuannaaleriartortut isigalugit assut nuannerpoq. Najorlugit soorlu akuuiinnarluniluunniit eqqarsarnarpoq, Juliane Henningsenip oqarpoq.
Barack Obamap qinigaanera nunarsuarmut tamarmut sunniuteqassasoq, Juliane Henningsen allarpassuartulli ilimagaa.
- Kisianni qularisassaanngilaq, silap kissakkiartorneranut inuit sunniutaat annertuumik iliuuseqarfigineqassasoq, tassungalu atatillugu sila pillugu Københavnimi 2009-mi isumaqatigiinniarnissani Obama USA-lu naatsorsuutigineqartariaqarput, Juliane Henningsen oqarpoq.
Aammali qinersineq nunatsinnut toqqaannartumik sunniuteqassasoq Folketingimut ilaasortaq isumaqarpoq. Assersuutigalugu nunatta USA-llu ilinniartitaanikkut, inuussutissarsiutinik ineriartortitsinikkut allatigullu suleqatigiinnerat, isumaqatigiissuteqarnikkut naqissuseqareertoq, pitsaanerulissasoq.
