Juliane Henningsen: Partii Inuit qinersisartutik ilaginnarpaat
Uranimut tunngatillugu akuersaanngilluinnarneq allanngortinneqassanngitsoq oqaatigineqarpoq. Partiimik pilersitsisup Nikku Olsenip qinersisartunik ataatsimiisitsinerni tv-kkullu oqallinnerni taamatut oqaqattaarpoq, naalakkersuisooqataalernissamullu Siumumit piumasaqaatigineqartut ilagimmassuk Partii Inuit isumartik allanngorteriasaarpaat.
- Inuit Ataqatigiit isumaqarpugut piffissaanngitsoq uran-mik qinngornernillu ulorianartunik annertunerusumik akullit nunatsinni piiarneqarsinnaalersillugit ammaanneqarnissaat. Eqqaamasariaqarpormi aatsitassaq matumani pineqartoq tassaammat nunarsuarmi pissaaneqarniunnermut sunniutilik aammalu nunatta sillimaniarnermi inissisimaneranut nunarsuarmioqatitsinnillu isigineqarneranut pingaaruteqartut, Juliane Henningsen nassuiaavoq.
Partiip naalakkersuisuutitaqarsimasup tunngavilersuutigiuartagaasa ilagaat pissutsit sukumiisumik misissornissaannut piffissaqartariaqarnera, isumartillu taanna qinersinerup kingorna illuatungiuliuttunngornerminni attatiinnarpaat. Taama pingaaruteqartigisunik aalajangiinnginnermi ilisimasanik paasissutissanillu amerlanerusunik pisariaqartitsisoqarnera attatiinnarneqarpoq.
-Naggataatigut Inuit Ataqatigiinniit piumasaraarput uranimik akulinnik piiaanissaq pillugu arlaannaanulluunniit aamma suliffeqarfissuarnik nunatsinni misissuisunik attuumassuteqanngittunik qulaajaasoqarnera ingerlatiinnarneqassasoq. Tamatumani pingaaruteqassaaq inuiaqatigiinnut sunniutaasinnaasut pitsaasut ajoqutaasinnaasullu tamaasa misissuiffigineqarnissaat. Ilisimasallu nutaat piutinnagit allatut isummernissamut toqqammavissaasuanarmat Partii Inuit kaammattussavarput qinersisini, politikkinilu ataqqillugit ingerlaqatigeqqulluta, Juliane Henningsen isumaqarpoq.