Issittumi qinikkat Ilulissani ippassaq ataatsimiinnerisa naalani Juliane Henningsen Radioaviisimut taama unnersiorpoq.
- Silap pissusaa pillugu Nunanit Issittunit taama toqqagaaneq tulluusimaarnarpoq, Juliane Henningsen oqarpoq.
Nalunaarusiortartutut suliniutigissavaa silap pissusaa pillugu Københavnimi decembarimi ataatsimeersuarnissap qanilliartornerrani, ataatsimeersuarnerullu nalaani, nipimik nunanit Issittumeersumik aamma tusagassaqartarnissaq.
- Nunat Issittumiittut allat attaveqaqatigisassavakka, silap pissusaa Issittorlu pillugit paasissutissanik katersissallunga, Juliane Henningsen oqarpoq, nangillunilu:
- Silap pissusaa Issittorlu pillugit oqariartuutit pingaarnersarissavaat Issittumi inoqarnera aamma paasissutissiissutigissallugu, uulia, aatsitassaat sikulu kisimik eqqartorneqassanngillat, Juliane Henningsen erseqqissaavoq.
Issittumi qinikkat ukiumut pingasoriarlutik-sisamariarlutik naapeqatigiittarput, Danmarkimit/Nunatsinnit, Norgemit, Sverigemit, Finlandimit, Islandimit, Ruslandimit, Canadamit USA-millu peqataasoqartarluni. Juliane Henningsen Folketingimi ilaasortaanini pissutigalugu peqataavoq.