Juliane Henningsen: Inuusuttut politikkimik paasinninnerulertariaqarput

Inuit Ataqatigiit inuusuttaat qulit missaannik aallartitaqarlutik siulersuisuunerni arlalinnik ilaasortaqalernertik ukiuni tullerni atorluarniarpaat. Politikkimik ingerlatsinermi ullormiit ullormut pisussaaffinniit tunuartertarnerit toqqissisimanarsorinngisatik ingalassimaniarpaat. Partiip sapaatip-akunnerani kingullermi ataatsimeersuarnerani IA-p inuusuttai pingasut siulersuisuunernut iserput. Ilaasortanngornertillu nunatsinni malunniulluarumaartoq, allatsinngortup Juliane Henningsenip qularinngilaa.

- Isumaqarpunga nukiit nutaat tassuunakkut tikilluaqquneqartut aammalu ilisimasanik ingerlatseqqiinissat partiip inuusuttunut tikilluaqqusinerat assorujussuaq inuiaqatigiinnit malugilluarneqarumaartoq. Isummat nutaat, anguniakkat anguniarneranut iluaqutaasussat isumaqarpunga malunnarluarumaartut ukiuni tulliuttuni, Juliane Henningsen oqarpoq.

Kulturimut suliniutit, soorlu inuusuttut eqqumiitsuliornikkut suliaasa tapersersorneqarnissaat IA-p pingaartippaa.

- Naggueqatitta inuusuttaasa suleqatiserinerusarnissaat assut eqqartortarparput, soorlu naapitsisarnikkut anguniagaqarnissat.

- Inuusuttut oqariartuutaannik ingerlatitseqqiisarnissaq uagut suliassatsinnut pingaartunut ilaavoq kiisalu namminersulivinnissamut apeqqut inuusuttunut oqallisigitissallugu assorujussuaq pingaartipparput, isumaqaratta inuusuttut ullumikkornit peqataanerusariaqartut, nangippoq.

Naalakkersuisooqataasimaneq inuusuttut immikkut eqqartorsimanngilaat, siunissamili naalakkersuisooqataaleqqissagunik inuusuttunit pingaartitatik ima Juliane Henningsenip eqqaavai:

- Tigussaaqqissaartumik partiimik eqqartuinngilagut, kisianni pingaartinnerpaavarput patajaatsumik innuuttaasunullu toqqissisimanartumik sullissoqartariaqartoq - ullormiit ullormut aalajangertarnerit aamma ullormiit ullormut pisussaaffinniit tunuartertarnerit tatiginanngilluinnarmata uagut suleqatigiinnermi pingaartinnerpaassavarput ataqqeqatigiinneq patajaatsumillu ingerlatsisinnaanneq. Isumaqarpugut inuusuttut innuttaasullu tamarmik pisaqariaqartikkaat. Tamanna aamma innuttaasut qatsussineranut pissutaaqataagami, ullutsinni politikkimi ingerlatsinermi.

Juliane Henningsen, Inuit Ataqatigiinni allatsinngortoq aamma oqarpoq, siulersuisuunerit qaammatini tullerni marluunni imminnut ilisareqatigiinniarlutik naapeqatigiittassasut, ataatsimiinnermilu tullermi eqqartugassat ilagaat inuusuttunut paasiuminartumik partiip malittarisassiuunneqarnissaa.

- Taamaalilluni inuusuttut politikkimik paasinninnerulernissaat aqqutissiuunneqassaaq, Julie Henningsen isumaqarpoq.

Inuit Ataqatigiit siulersuisuunerini inuusuttut ilaasortanngortut allat marluk tassaapput Jane Petersen, Aasianniit kiisalu Aviaaja Vandersee, Nuuk.