Juliane Henningsen: Ilisimatusarnermi paasisat innuttaasunut iluaqutaassapput

Ilisimatusarnermi paasisat ilisimalikkallu innuttaasunut annerpaamik iluaqutaanissaat atorneqarnissaallu anguniarlugu, inuiaqatigiinnut ingerlatitseqqiivissamik pilersitsinissamik Naalakkersuisut pilersaaruteqarnerlutik? Taama IA-mi ilaasortaq Juliane Henningsen Inatsisartut Suleriaasianni § 36, imm. 1 naapertorlugu Naalakkersuisunut apeqquteqarpoq.
aggustip 28-at 2008 07:12

-Nunani issittuni aatsaat taama ilisimatusartoqartigaaq, Nunanut Issittunut Ukiorititaasut nunat issittuniittut nunarpullumi immikkut sammineqartippaat. Nunani issittuni silap pissusaata allanngoriartornera qitiutillugu Nuummi ataatsimeersuartoqaqqammerpoq, taamaattumillu apeqqut manna tulluarluinnarpoq qaqissallugu, Juliane Henningsen tunngavilersuivoq.

Ilimmarfik ilisimasanut ilisimatusarnermilu paasisanut tunngatillugu qitiulluinnartutut inissisimavoq. Ilisimaligaasalu inuiaqatigiinnut siammarterneqartarnissaannut, Naalakkersuisut aningaasaliinissaminnut piareersimanerlutik? Juliane Henningsen aperaaq.