Juliane Folketingimi suleqqilerpoq

Kalaallit Danmarkimi inuuniarnikkut ajornartorsiuteqartut qanoq pitsaanerusumik atugaqalersinnaanissaat paasiniarneqassaaq kalaallit illuinik taakkunanngalu atuisunik oqaloqateqartarnikkut.

Folketingimut ilaasortaq Juliane Henningsen, Inuit Ataqatigiit, meerartaarnermut atatillugu sulinngigffeqareerluni sulileqqittoq ima oqarpoq.

- Kalaallit aammalu savalimmiormiut illui peqatigiiffiisalu ilaat oqaloqatiginiarpagut tikillugit, pissutigalugu innuttaasut maani aammalu savalimmiormiuusut atugaat aammalu inatsisitigut pisinnaatitaaffii misissuiffigilersaaratsigit - inuttaasalu nammineq tikillugit oqaloqatiginissaasa nanginnissaat pilersaarutigiaarput. Kalaallit inuuniarnermikkut immikkut ajornartorsiortut immikkut sammissuagut, Juliane Henningsen oqarpoq.

Kalaallit ornittagaat pisortanit ingerlanneqartut ilaasa ukiortaamiik ammaannarsinnaanerat qulakkeerneqarsimanngimmat piaartumik sunniiniaqataaffigineqassasut, Juliane Henningsen oqarpoq.

- Kalaaleqatigut naalagaaffiup aamma akisussaaqataaffigivai, taamaattumillu aamma suliat assigiinngitsut ukiumi tullerminngaanniik unitsinniarsarilersaarneqarmata, taakkua tuaviortumik sunniiniaqataaffigisinnaavagut, Juliane Henningsen oqarpoq.

Nunarsuarmi uumasunik illersuiniaqatigiit peqatigalugit isumasioqatigiissitsinermik atlantikup avannaani suleqatigiit pilersaaruteqarput.

- Uumasunik illersuiniaqatigiiffiit ukiuni makkunani politikkikkut sunniiniarnerat aammalu ilisimasanik eqqunngitsunik aallaaveqarlutik suliniarnerat akiorniarlugu isumasioqatigiissitsinermik pilersaaruteqarpugut, pingaartikkatsigu innuttaasut aammalu piniartuunerup aalisartuunerullu pitsaaqutai aammalu pissusiviusunik imaqartumik oqallisigineqarnissaat anguniarlugu oqaloqatigiinnissaq siunniupparput, Juliane Henningsen oqarpoq.