Juliane: Amerlanerusunik atorfissaqartitsisoqarpoq
Folketingimi ilaasortaq Juliane Henningsen aningaasat tunniunneqartut nuannaarutigigaluarlugit, tunniunneqartuniit amerlanerusunik atorfissaqartitsisoqartoq oqaatigaa.
- Qujanarpoq 6 millioninik aningaasaliisoqarniarmat. Pissutigalugu suliat taakku ingerlaqqittariaqarmata. Aammalu tamarmik ingerlaqqissappata oqaatigineqarpoq suliaqartut politikkerit ataatsimiititsinitsinni paasinarsimmat 8 millionit sinnerlugit pisariaqartinneqartut. Taamaattumik 6 millioni koruunit suli naammanngillat. Massakkut suliassanngorpoq suna paasiniassallugu amigaataalissanersut. Inuit atugarliortut angerlarsimaffimmittut, najummatserfigisaallu piiannginnissaat anguniassavarput.
Juliane Hennignsen taama oqarpoq.
Juliane Henningsen isumaqarpoq, suliniutissanut aningaasaliissutit siunissamut qulakkeereerlugit tunniunneqartalertariaqartut, maannakkummi ukioq ataaseq allorlugu isumaqatiginninniutaasarpoq qanoq amerlatigisunik aniningaasaliisoqartassanersoq.
Kalaallit Danmarkimi atugarliuteqartunut aningaasaliissutigineqartartut aningaasaqarnermut inatsimmut ilanngunneqarnissaa kissaatigineqarpoq.
- Danskit partiivi oqaloqatigeqqissavagut qanoq ukiut marlukkaarnagit, ataavartumilli aningaasaliisoqartalernissaa anguniassavarput.
Kalaalllit atugarliortutut taaneqartut tunniunneqartartut aningaasanut inatsimmut ilannguttuuppata, Kalaallit Nunaanniit nuuttartut ikiorneqartalissagaluarput. Juliane Henningsenip ilimagaa Kalaallit 200-t Københavnimi angerlarsimaffeqarnatik inuusut.
- Iliuutsit nutaat aammalu tulluussakkat pisariaqarput. Inuit ilaat inuunerminni ingerlatsisinnaajunnaarsimasut Danmarkimut nuuttut inunnut taakkununnga akuulinnginnissaat anguniassavarput. Danmarkimut noorlaat immikkut ikiorserneqartariaqarput taakkununnga akuulissanngippata. Taamaattumik qulakkeertariaqarparput kalaallit qallunaatut oqalussinnaanngitsut allatuulli pineqarnatik namminneq sullinneqarlutillu kulturertik oqaatsitigullu sullinneqarnissaat taanna pingaarnerpaajusoq ukiuni tulliuttuni ataavartumik qulakkeertariaqarparput.
