Juliane akissummik piumavoq
Folketingimut Inatsisartunullu ilaasortaq, Juliane Henningsen Nunatta Danmarkillu silaannartaanni CIA-p tigusanik timmisartuussisarsimaneragaanera pillugu Qallunaat nunanut allanut tunngasunut ministeriannut, Lene Espersenimut, apeqquteqaateqaqqippoq.
Allattoq Apollo Jeremiassen
maajip 19-at 2011 14:44
Tamanna pivoq Naalagaaffiit Peqatigiit inuit pisinnaatitaaffii pillugit siunnersuisoqatigiivisa pisoq pillugu qallunaat naalakkersuisui isornartorsioreeraat aammalu naalakkersuisut qanoq iliuuseqaqqullugit ujartuiffigereeraat.
Inuit pisinnaatitaaffii pillugit siunersuisoqatigiit isornartorsiutaat nunanut allanut tunngasunut ministerip, Lene Espersenip, qanoq isumaqarfigineraa, Juliane Henningsenip paaserusuppaa.
Danmarkip pisoq ammasumik qulaajaaffigissagaa Juliane Henningsenip saaffiginnissutimini aamma piumasaqaatigaa.
- Siunnersuisoqatigiit innersuussutaat ministerip malinniarnerlugit? Taamaassappat qanoq qaqugulu? Juliane Henningsen toqqaannartumi taama aperivoq.
