Julefrostertarneq eqqissisimanerujartorpoq

Juulleriartuleruttorpoq, suliffeqarfinnilu aamma julefrostertoqaqattaaleruttorpoq. Ukiut ingerlanerini julefrokostertarnerit eqqarsaatigalugit imigassartorsimallutik biilertut, inoqammullu annersaasut amerliartorsimanersut vicepoliti inspektørimut Karl Henrik Simonsenimut apeqqutigaarput.

- Ukiut kingulliit maluginiarsimavara imigassartorlutik biilertut juullip tungaanut amerliartunngitsut immaqalu ikiliartortut aamma inuit pikkoriffiginerulersimavaat biilitillu uninngatiinnartaraat, ataatsimut isigalugu inuiaqatigiinni isumaqarpunga imminnut pisarnerit taamatut ajortikkiartunngitsut, Karl Henrik Simonsen oqarpoq.

Toqqissisimasumik juullip qanilliartornissaa eqqarsaatigalugu inuit suna eqqaamasariaqarpaat?

- julefrokostip naligimmassuk, eqqaamasassaagunarpoq, juulli tamatta nuannaarfigisarparput, taamaattumik julefrokosternermi suliffimmi ajornartorsiutit puigorallarnissai pingaaruteqarpoq, nuannaaginnarlunilu, tamakkumi ataasinngornermi eqqartorneqarsinnaapput, oqarpoq.

Juulli meeqqanut pigitinneqartarpoq, taakkuusannginnerpat eqqugaanerpaajusartut?

- Ilaqutariit iluanni meeraqarsimappat tamatigorluinnaq angajoqqaat imalt. Inersimasut imminnut ajortumik pippata pinngitsoorani meeqqat eqqugaassapput. Taamaattumik meeqqat sapinngisamik nuannersumik juullisiortittariaqarput, taama oqarpoq vicepoliti inspektøri Karl Henrik Simonsen.