Jugoslaviaasimasumi toqoraanersuarmut akisussaasut eqqartuussaapput

Jugoslaviaasimasumi Srebrenicami ukiut 15-it qaangiupput angutit nukappiaqqallu muslimiusut 8000-it tungaannut amerlatigisut toqutaammata. Haagimi Hollandimiittumi nunat tamat sorsunnermi pinerluuteqarsimasunik eqqartuussivianni ullumi siullerpaasumik eqqartuussisoqarpoq.
Allattoq Nauja Møller
juunip 10-at 2010 16:59

Inuiannik toqoraasimasutut Serbiamiut Bosniami najugallit marluk inuunermik sinnerani parnaarussivimmiittussanngortinneqarput. Allallu tallimat toqoraanersuarmut ilaasimasutut ukiuni tallimaniit ukiut 35-t angullugit parnaarussivimmiittussanngortitaallutik.

Isumannaallisaanermut pisortat nuimasut marluk Vujadin Popovic aamma Ljubisa Beara inuiannut toqoraasimasutut unnerluutigisaanermik saniatigut inuiannik nungusaasutut, toqoraasutut malersuisutullu eqqartuunneqarput.

Serbiamiut Bosniami najugallit siuttuat Radovan Karadzicimiit inuiannik toqoraanissaq naalakkiutaasoq eqqartuussisut naqissuserpaat.

Inunnillu amerlanerpaanik toqutsinissaq anguniagaasimasoq eqqartuussisunit inernilerneqarpoq:

- Aaqqissuussamik annertuumillu toqoraaneq, toqutanillu aalajangersimalluartumik malersuinerup takutippaa, angutit Bosniamiut muslimiusut tigusaasut tamarmik toqorarneqarnissaat siunertaasimasoq. Inuiannillu toqoraanerusoq tamatumani uppernarsineqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq