Juaap Dorisillu EU-kommissæri kimigiiserfigigaat
Folketingimut ilaasortat allakkaminni Bruxellesimi ataatsimeqaatigiinnermut, kommissærip danskit kalaallillu aallartitaat peqatigalugit qanittukkut peqataaffigisaanut, qujassuteqarput.
Ataatsimiinnermi tassani, EU-p EU-mi politikerinut innuttaasunullu allanut naggueqatigiit Inuit puisinniartarnerannik aammalu inooriaasiannik paasitsiniaanissaa ilaatigut eqqartorneqarpoq. Paasitsiniaanermi puisinniarnerup piujuaannartitsinissaq tunngavigalugu ingerlanneqarnera puisinniarnermillu inuussutissarsiuteqarnerup kalaallit piniartortaannut pingaaruteqassusaa aamma oqaluttuariniarneqarpoq.
Juunip ulluisa sisamaat aalajangiiffiussaaq
Margrethe Vestagerip, Danmarkimi ukiorpassuarni naalakkersuinikkut suliaqareerluni EU-mi unammilleqatigiinnermut ukiaq kommissærinngortinneqartup, EU-p puisit amiinik eqqussuinermut aalajangersakkamik sukateriniarneranut Danmarkip Kalaallit Nunaatalu akerliunerannik tapersersuinissaa pingaaruteqartupilussuuvoq. Suliaq EU-p iluani Niuerfimmut Atuisartullu illersugaanerannut Ataatsimiititaliamit (IMCO-mit) juunip sisamaani isummerfigineqaralluartussaavoq.
EU-kommissærillu nunagisaminni soqutigisanik pisortatigoortumik suliaqaqqusaanngikkaluartut, Johan Lund Olsenip neriuutigaa, Vestagerip EU-mi parlamentarikerit sunnerniarsinnaassagai:
- Ilisimaneqartutut, Margrethe Vestager EU-mi Unammilleqatigiinnermut kommissæriuvoq, taamaammat pingaaruteqarpoq pissusissamisoorlunilu kalaallit puisinniartarnerannik tapersersuineranik aalajangiusimaannartinniarnissaa. Tamannalu allakkiatta siunertaraa, aamma neriuutigaara suliami matumani sunniuteqarsinnaanini atussagaa, inuiaqatigiinnummi kalaallinut tamanut pingaaruteqartupilussuuvoq, Johan Lund Olsen tusagassiorfinnut nalunaaruteqarluni taama allappoq.
AAMMA ATUARUK Inuit Silap puisit pillugit paasititsiniaanera sammineqarluartoq
Suliniaqatigiinnit Inuit Silameersut EU-mi illoqarfimmi inatsisartoqarfimmi allami, Strassbourgimi Frankrigimiittumi, sapaatit-akunnerani matumani paasititsiniaapput. Doris Jakobsen aamma tassani peqataavoq, suliallu ilungersunartuunerata amerlanerusunit paasiartorneqalernera neriuuteqalersitsinerarpaa:
- Matumani suliaq, kalaallit danskillu tungaannit partiillu akimorlugit ataatsimoorfigisinnaagatsigu nuannaarutigaara. EU-mi parlamentarikerit tusagassiorfiillu nunanit tamalaaneersut soqutiginninnerat Strassbourgimiinninni nammineerlunga takuara. Neriuppunga Margrethe Vestagerimut allagaqarnitsigut soqutiginnilersissinnaassagipput suliamilu matumani toqqaannarnerusumik tapersersuinissaa angullugu, Doris Jakobsen tusagassiorfinnut nalunaarummi taama allappoq.
