Juaaka: Politikerit avaqqussinnaanngilagut

Juaaka Lyberth ima tunngavilersuivoq:

- Maanna pissusiusut uniffiusullu qaangerlugit, siunissamut isigisumik tusagassiuteqarnikkut innuttaasunillu sullissineq pillugu politikkiliussagaanni, aningaasaqarnikkut suliffeqarnikkullu maanna sinaakkutissarititat pitsanngorsarlugit, tamatumuunakkullu aallakaatitassiat amerlillugit, taava politikkerit akuliutsinneqarnissaat avaqqussinnaanngilarput. Taamaattuminguna siulersuisoqatikka sinnerlugit tusagassiuteqarneq pillugu ataatsimiitaliarsuarmik pilersitsisoqarnissaa siunnersuutigigiga, taamaasiorneq politikkikkut suleriaqqinnissamut pisussaaffiliissammat.

Taamannak siunnersuuteqarneq isumaqanngilaq kiffaanngissuseqartumik aviisiliorsinnaatitaanermut politikkerit akuliutsinniarikka. Taamaanngilluinnarpoq. Politikkerilli isummersorfigisariaqarpaat naqisimaneqanngitsumik isummersorsinnaatitaaneq oqaaseqarsinnaatitaanerlu qanoq ittunik periarfissinneqassanersut, innuttaasunik sullissilluni tusagassiorsinnaatitaaneq aammami tusagassiuteqarneq ataatsimut isigalugu, tamakkumi innuttaasut oqartussaaqataaneranni pinngitsoorneqarsinnaanngimmata, ineriartortinneqartariaqarlutillu’, Juaaka Lyberth allappoq oqaatigalugulu piffissalersuilluni ingerlariaqqinnissaq pingaaruteqartoq, alloriarnissat tulleriit arlallit atorlugit suleriaqqittoqassappat.

Juaaka Lyberthip siunnersuutaa KNR-ip qanittukkut isumasioqatigiissitsinerani naalakkersuisut ilaatitaannit naalakkersuisunut ilaasortamit Arkalo Abelsenimit aamma Inatsisartut kulturimut ataatsimiittaliaata siulittaasuata tullianit Ruth Heilmannimit taperserneqarpoq.