Juaaka Lyberthip atuakkiaa, Naleqqusseruttortut, danskisuunngorlugu saqqummissaaq
Godt i vej (Naleqqusseruttortut)tassaavoq 1960-kkunni Kalaallit Nunaanni inuusuttut inuunerat, aarleqquteqannginneq, asannilersoornerit, asanninneq naalliuutaasoq, aammalu atuarfiup aaqqissuussaaffiani aamma inuiaqatigiinni qallunaat qullersaqarfigisaanni nunasiaatigisatullu isummerfigisimasaanni pikitsitsinialerusussuseq pillugit atuakkiaq.
Juaaka Lyberthip kinguaariinnut, ilinniagaqarnermut tunngatillugu iliuuseqarfiusut – taamanikkut ’60-ikkut naaneranni inuusuttuusut – tusarsaalersillugit inuttalerpai.
Juaaka Lyberth nipilersortartutut erinniartartutullu, tusagassiuutinilu allaaserinnittarlunilu oqallitsitsisartutut ilisimaneqarpoq. Kalaallit Nunaanni kultureqarnermi ukiorpassuarni annertuumik peqataasimavoq, isiginnaartitsisarnerup nipilersornerullu iluini suliaqartuusugut, aammalu kulturip illorsuini Katuami Taseralimmilu pisortatut. 2000-imi Namminersornerullutik Oqartussat kultureqassutsimi nersornaasiuttagaanik nersornaaserneqarpoq. Naleqqusseruttortut/Godt i vej tassaavoq atuakkiaq saqqummerseqqaagaa. 2014-imi Nordisk Råds Litteraturprisimik nersornaasigassanngorlugu piukkunneqarpoq.
Lars Windip siusinnerusukkut ilaatigut qallunaatuunngortitarai Hans Anthon Lyngep atuakkiai Umiarsuup tikinngilaataani (Lige før der kommer skib) aamma Allaqqitat (Bekendelser).
Atuakkap Godt i vejr saqqummersinneqarnera Nuuk Centerimi tallimanngorpat marsip 7-iani nal. 16.00 nalliussineqassaaq, Juaakallu nipilersoqatitoqai, Small Fools, Torvimi appissapput. Atuagkat Bog&Idemi kaffeqarlunilu kaageqassaaq atuakkanillu neqerooruteqarluni tuniniaasoqassalluni.