Juaaka Lyberth: Nunaqarfinnik matooraaniartoqassagaluarpat IA-mut tulluarnavianngilaq

Nunaqarfiit 100-t inorlugit inuttussusillit matuneqarsinnaasut Palle Christiansenip Demokraatineersup qineqqussaarnerup nalaani oqallisissatut saqqummiuppaa. Nunaqarfiup Moriusap marlunnik inoqartup ukiumut ingerlanneqarnera 2 millionit koruuninik akeqarpoq, Namminersorlutik Oqartussat kiffartuussinissamik isumaqatigiissutaat pissutigalugu. Inuit Ataqatigiit naalakkersuisuutillugit nunaqarfinnik matusisoqarnissaa inuiaqatigiinni oqallinnermi peqataasartup Juaaka Lyberthip naatsorsuutiginngilaa:

- Nunaqarfiit pillugit ukiumi qaangiutilersumi oqallittoqarmat Palle Christiansenip inatsisartunut qineqqusaarnermini ilaatigut oqaatigaa nunaqarfiit 100-t inorlugit inuttussusillit matuneqarnissaat sulissutigineqartariaqartoq. Naalakkersuisunngortitsinermi kingorna tamanna tununneqarpoq, tamannalu eqqaamaniarneqarnerussaaq, Juaaka Lyberth oqarpoq.

Nunaqarfiup Moriusap Qaanaamit 80 kilometerinik kujasinnerusumi inissisimasup oqallisaanera nunatsinni nunaqarfeqarnerup unammillernartoqassusia ersarissisikkaa, Juaaka Lyberth oqarpoq:

- Nunatsinni nunaqarfiit pillugit ajornartorsiutit Moriusap ersarissisikkaa isumaqarpunga. Illuatungaani takuneqarsinnaavoq akisuallaartoq, aningaasat eqqarsaatigigutsigit, kisiannili ingerlaannarlugu matutikkuminaatsoq. Naalakkersuisummi oqarput pilersuinissaq pillugu isumaqatigiissusioreerlutik, taakkualu unitsinneqaraluarpata aningaasat akiliutigineqareersut utertikkuminaassammata, Juaaka Lyberth oqarpoq.

Inuit Ataqatigiit naalakkersuisuutitaqarneranni nunaqarfinnik matusisoqarnavianngistoq, Juaaka Lyberth oqarpoq:

- Inuit Ataqatigiit tassaarusunnavianngillat Namminersulernermi partii siullersaalluni nunaqarfinnik matusisutut oqaluttuarisaanermi inisserusussasoq. Nalunngilarpummi IA-p suna politikerineraa, aamma nunaqarfimmik matuseqqaartuugaluarunik IA-p qinersisartuinut partiimullu tulluarpallaarnavianngitsoq. Taamaattumik isumaqarpunga Moriusaq matuneqalertornavianngitsoq, ukiut arlallit ingerlatiinnarneqarallassaaq, piffissarlu sulisillugu, Juaaka Lyberth oqarpoq.

Nunaqarfiit aningaasanik ikittunik taarsigassarsisinneqarsinnaanissaat Inuussutissarsiornermut Naalakkersuisup Ove Karl Berthelsenip misissugassaqqissuusoq oqaatigaa. Nunaqarfinni inoqarfinnilu avinngarusimasuniiittuni pissutsit pillugit misissuisitsinermut atatillugu ikittunik taarsigassarsisinnaaneq misissuiffigineqassaaq.