Juaaka Lyberth KNR-imi siulersuisuni siulittaasunngorpoq

Kultoorikkut illorsuup Katuap pisortaa 52-inik ukiulik Juaaka Lyberth Kalaallit Nunaata Radioata siulersuisuini siulittaasunngorpoq, naalakkersuisunit toqqagaalluni. Juaaka Lyberth oqarpoq, toqqarneqarsimanini ippassaq aatsaat tusarsimallugu, taamaattumillu anguniakkaminik annerusumik oqaaseqarsinnaanngikkallarluni:

- Siulittaasutut pilersaarutinnik oqaaseqarnissara siusippallaarpoq. Siulersuisuni ilaasortat arlaliupput, aamma sulisoqarpoq tusarnaartartoqarlunilu. Peqatigiilluta isumasioqatigiillutalu inerisaassaavut. Aamma eqqaamassavarput inatsisartut nutaamik inatsisiliortussaammata, taamaattumik tamakku tamarmik apeqqutaassapput siunissaq eqqarsaatigalugu. Juaaka Lyberth oqarpoq.

KNR-imi aporaattoqartarnera ilisimaneqarpoq, qanoq illit imminut katersuuffiusinnaasutut takorloorpit ?

- Siulersuisut suliassaqarput akisussaaffeqarlutillu inatsisitigut allassimasunik. Soorunami siulersuisut nalerassaminnik toqqaassapput, ineriartortikkusutaminnik. Taassuma saniatigut immikkoortortaqarfiit pisortaqartiterput, taakkulu ulluinnarni aqutsinermik akisussaasuullutik. Taamaattumik siulersuisut immikkoortortallu suliassaat ataastimoortinnaveersaarnissaat pisariaqarpoq. Juaaka Lyberth nassuiaavoq.

Juaaka Lyberth aamma oqarpoq, nammineq siunissami eqqaamaneqaatigerusussinnaallugu, radiomik tusarnaarnissamik nuannarisalittut. Tamannalumi pillugu isummersuutinik arlalinnik tusagassiutitigut allagaqaateqartarsimavoq.

- Taanna eqqaamaneqaatigissagukku nuannaarlunga utoqqaliumaarpunga. Siulittaasunngortoq oqarpoq.

KNR-ip siulersuisuini siulittaasunngortup Juaaka Lyberthip siulersuisuni, suliffeqarfimmi pisortanik kulturimut pisortaqarfimmillu suleqateqarluarnissami anguniarnissaata saniatigut sulisut tusaaniarneqarluartarnissaat minnerunngitsumillu tusarnaartartut isiginnaartartullu KNR-ip ineriartorteqqinnissanut isumasiorneqarnissaat pingaartinnerarpaa.

KNR-ip siulersuisuinut ilaasortatut Naalakkersuisunit toqqarneqartut allat tassaapput: Lisbeth Søvndahl Pedersen, Rigmor Th. Høegh, Sofia Geisler, Svend Møller, Mariia Simonsen og Mikisoq Hove Lynge. Siulersuisut ukioq manna novemberip aallaqqaataanit 2007-p naanissaata tungaanut atuutissapput.