Juaaka Band Taseralimmut

Siorna Pilu Noahsenip cd-liaqqaataa ”Pissanganarsileqaaq” saqqummerpoq, tassani Juuna Zethsen erinniortuullunilu taalliortuuvoq. Immikkoortoq siulleq 50-60 minutsit missaani sivisussuseqassaaq.

Immikkoortut aappaani Juaaka nipilersoqateqarluni tusarnaartitsissaaq. Erinnat tusarnaartitsissutigineqartussat Juaakap cd-liarisarsimasaaniissapput, ”Kalaaleqatikka”, ”Oqaluttuat” aamma ”Naasumik Paju”-mit. Erinnat ilisimaneqarluartut nuannarineqarluartullu aliannaarfigineqarsinnaassapput, soorlu ”Lis Mari”, ”Asasannut”, ”Pullartatut” allarpassuillu. Juaakap cd-liaa ”Naasumik paju” 2011-mi saqqummersoq, nuannarineqarluarami tunisaalluarsimavoq, 2013-milu februarimi Juaakap cd-liatoqai ”Kalaaleqatinnut oqaluttuat” saqqummersinneqaqqipput.

2012-mi Juaakap atuakkiaqqaava ”Naleqqusseruttortut” saqqummerpoq, taassumalu taalliartaanik Juaaka atuffassilaartussavoq Taseralimmi.

-Taseraliliarnissarput assut qilanaaraarput. 1974-mi ”Lis Mari” radiukkut saqqummeqqaarmalli apeqqutigineqartualersimavoq Lis Mari kinaanersoq. CD-illu ”Naasumik Paju”-p saqqummernerata kingorna suli sukariaannarlutik paasiniaasut imaaginnavipput. Taseralimmi tusarnaartitsilerutta imaassinnaavoq erinnap ”Lis Mari”-p oqaluttuassartaa tusarliukkiga - nalunarumaanngilaq”, Juaaka Lyberth oqarpoq, Taseraliup atuleqqaarnerani 2007-2010 Taseralimmi pisortaasoq.

Juaakap nipilersortartumi Hollywood Band-imik atsissanerlugit eqqarsaatiginerarpai, tassa erinarsuusiami ”Sinigit meerannguup” Hollywood-imi filmiliat ilaanni, Gravity-mi, Sandra Bullock aamma George Clooney –p inuttaaffigisaanni, oktoberimi takutinneqaqqaartussami, atorneqarsinnaanersoq apeqqutilliissutigineqarsimammat.