Juaaka: Aningaasanik ikililerineqarnerput qilammiit innaallannersuartut sakkortutigaaq

Aningaasanut inatsisissamit Nunatta Isiginnaartitsisarfia 3 million koruuninik ilanngaaffigineqarpoq, ilaatigut KNR-ip illorsuassaanut aningaasat atorneqassallutik. Tamannalu pissutigalugu Nunatta Isiginnaartitsiviata aappaagumut pilersaarutitik nutaamik isummersorfigisariaqalissagaat, Nunatta Isiginnaartitsiviani siulersuisuini siulittaasup, Juaaka Lyberth-ip oqaatigaa.
Allattoq Apollo Jeremiassen
novembarip 14-at 2013 12:20

- Qilamminngaannit innaallannersuartut sakkortutigisutut oqaloqatigineqaqqaaratalu tusarliunneqarpoq, Nunatta Isiginnaartitsivianut tapiissutaasartut 3 million koruuninik ilanngarneqarneri, Juaaka Lyberth oqarpoq.

Nunatta Isiginnaartitsisarfia aningaasanut inatsimmit 2011-imiit aningaasaliiffigineqartalerpoq ukiumut 10 million koruuninik amerlassusilikkanik, aningaasat ilaatigut isiginnaartitsisartunngorniat ilinniarfiannut, ullumikkut sisamanik ilinniartulimmut atorneqarlutik.

- Isiginnaartitsisartunngorniat ilinniarfissaannik aamma Nunatta Isiginnaartitsisartoqarfiata sulisuisa sullivissaannik inimik attartoqqammerpugut akisuumik, taakkununngalu aningaasartuutit ulluinnarni ingerlatinermut aningaasanik atugassatsinnit tigusariaqarsimavagut allatut periarfissaqannginnatta.

Aningaasanik ikinninnernik pisartagaqalernissami, Nunatta Isiginnaartitsiviata inissaasuanera kisimi ajornartorsiutaalersussaanngitsoq, Juaaka Lyberth-ip oqaatigaa.

- Sinerissami illoqarfinnut allanut isiginnaartitsiartortarnissarput annikinnerulersittussaalissavarput tamatumalu saniatigut isiginnaagassiat suliarineqartartut ikilisittariaqassallutigit. Aningaasat taama amerlatigisut tassanngaannartumik arsaarinnissutigineqarmata ajuusaarnarpoq uggornarlunilu.

Juaaka Lyberth taama oqarpoq imalu nangilluni.

- Maanna eqqumiitsorujussuarmik aningaasaqarnikkut inissisimalerpugut taamaattumillu aningaasaqarnerput misissoqqissaartariaqalissallutigu. Aappaagumut pilersaarutit soorlu nutaamik initaarnissaq allappassuillu pilersaarutigeriikkavut misissoqqissaariarlugit allatut pilersaarusiortariaqassaagut.

Nunatta Isiginnaartitsisarfiata siulersuisuisa siulittaasuat, Juaaka Lyberth taama oqapoq.

Isiginnaartitsarfiup pisortaa, Svenn Syrin KNR-imut oqarpoq, Nunatta Isiginnaartitsarfiata 3 million koruuninik ilanngaavigineqarnerani, Isiginnaartitsisarnermut inatsit Oqatussanit unioqqutinneqarmat oqarlunilu, qanga Silamiut aallartinneranni pissutsinut maanna utertinneqarlutillusooq misigisimaleramik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq