Juaaka aatsitassarsiornermut saappoq
Kulturikkut illorsuarni Nuummi Katuami Sisimiunilu Taseralimmi pisortaasimasoq Juaaka Lyberth martsip aallaqqaataanni atorfinitsinneqassaaq.
Alumiiniumik aatsitsiviliornissamut suliniutip innuttaasunit ilisimaneqarnerulernissaa soqutigineqarnerulernissaalu taassuma suliassaraa.
Tamanna pissaaq tv-kkut radiukkullu paasissutissiinerup immikkut isiginiarneqarneratigut, tusagasseeriaatsilli allat aamma atorlugit suliniut paasissutissiissutigineqassaaq, taamaalilluni alumiiniumik aatsitsiviup piviusunngortinneqassagaluaruni Nunatsinnut sunniutissai pillugit oqallinneq sakkortusarneqarniassammat.
Greenland Development nittartagaqareerpoq tassaasumik www.aluminium.gl suliniullu pillugu paasissutissanik arlalissuarnik tassani peqareerpoq, innuttaasullu amerlanerusut nittartakkamik atuilernissaat, Juaaka Lyberthip suliassaasa ilagaat.