José Manuel Barroso isornartorsiorneqarpoq
Europami avatangiisit pillugit suliniaqatigiiffimmi pisortaq, Jacquiline McGlade, Stockholmip universitetiani ilisimatooq, Johan Rockström, peqatigalugu oqarput Barrosop G8-p L'Aquilami Italiamiittumi qaammatip matuma aallartinnerani ataatsimiinnerani silaannaap allanngoriartornera ilisimatuussutsikkut aaqqiissutissaqarnerarsimagaa, soorlu "gradit marluk sinnernagit" kianninngortinnaveersaaginnarneqassasoq. Tamannalu, Barrosop oqarnera tunngavigalugu, pisinnaavoq 1990-imi CO2-mik aniatitsinerup 2050-imi affaannanngortinneratigut.
"Inuiassuit tamatumuunakkut kukkulluni isumalluartinneqalissapput" Jackqueline McGlade Johan Rockströmilu oqallissaarumminni allapput.
- Barrosop oqarnera eqqortuunngilaq, taamaasiornerlu navianarlunilu akisussaassuseqanngitsuliorneruvoq. Silaannaap kissakkiartornera ernumanartorsiornerneroqaaq. FN-ip silaannaq pillugu isumalioqatigiisitaasa 2007-imi takutereerpaat CO2-mik aniatitsineq 2050-imi 90 procentit tikillugit annikillisinneqartariaqartoq, McGlade Rockströmilu allapput.
- Taamaammanuna anorersualeruttortoq Barrosop seqinnarissorsuunerartariaqanngikka, McGlade Rockströmilu allapput neriunnerarlutillu nunat EU-meersut avatangiisit silaannarlu pillugit ministerii sapaatit akunnerata tulliani Jämtlandimi Sverigemiittumi ataatsimiilerpata ajornartorsiut pillugu piviusorsiornerusumik isummerumaartut.
Sapaatip-akunnerani tullermi ataatsimiinnissaq silaannaq pillugu Københavnimi decembarimi ataatsimeersuarnissamut piareersarfiussaaq, taamanikkussamilu naalakkersuisut siuttui nunarsuarmi tamaneersut Kyotomi isumaqatigiissummik taarsiisussamik silaannaap allanngoriartornera pillugu isumaqatigiissuteqarniartussaapput.
