Josef Petersen: Sulisut tunineqarnerat tulluartuuvoq
Narsami borgmesteriugallartoq erseqqissaavoq sulisunut agguaanneqartut taasaanngimmata sinneqartoorutit, tassaallutilli missingersuusianeereersut nikisitsinikkut immikkut aningaasaliissutissanngortut.
Allattoq Najaaraq Egede
decembarip 30-at 2008 16:11
Narsami borgmesteriugallartoq Josef Petersen (Atassut) pisoq pillugu ima oqaaseqarpoq.
- Ippassaq radioaviisimi oqaatigineqartoq erseqqissaaviginiarpara aningaasat atorneqartut Kommunip sinneqartoorutaanit atorneqanngimmata. Kisiannili aningaassaliissutit 2008-ip missingersuutaanit naatsorsuutigineqartunit nikisitsinikkut nassaarineqarlutik aningaasat atorneqarmata, Josef Petersen Narsami borgmestriugallartoq taama oqarpoq.
Josef Petersenip ilanngullugu oqaatigaa, Narsap Kommuneata allaffissuani sulisut 4.000 koruuninik tunineqarneri tulluartuusoq. Tassami sulisut Kommunerujussuarmut ikaarsaarnissamut atatillugu sulilluarsimammata, Narsami borgmesteriugallartoq Josef Petersen oqarpoq.
