Nunatta USA-mi politikerinit nuimasunik pingasunngorpamiit tikeraartoqarnissaa, tassaavoq amerikap nunattalu suleqatigiinnerunissamik Igalikumi 2004-mi atsioqatigiinnerisa kingorna pisut ilassaannaat.
USA-mi senatori republikaneriusoq John McCain USA-p præsidentissaatut tullertut eqqoriarneqartalereersoq tikeraanut ilaassaaq.
Ulloqeqqanut radioaviseqarnitsinni tusarparput Danskit avatangiisinut ministeriat Connie Hedegaard oqartoq, nunarsuarmi silaannaap allanngoriartornera kimilimmik suliniuteqarfigineqassappat USA-mi republikanerit sunnerniartariaqartut. Tamannarpiaq tunngavigalugu USA-mit tikittussat sapaatip-akunnerani tullermi Qeqertarsuup Tunuanukaqatiginiaritik Connie Hedegaard oqarpoq.
Nunatta nunanut allanut naalakkersuisuata Josef Motzfeldtip erseqqissarpaa, tikeraartimik politikkimik sumik ingerlataqarnerat suminngaanneernerallu apeqqutaanngitsoq. Imalu aallartippoq:
- Senatorit tallimaanngikkunik arfinillit tikerartussat tassa nunatsinnut tikeraartussaapput, nunarpullu tassaasussaavoq tikeraartitsisoq. Uagutsinnut manna tikillugu naalakkersuinikkut suliaqartutut - naalakkersuisuninngaanniit - ippigisarput tassaavoq, danskit avatangiisinut ministeriata, siullermiilernani, nunarput nammineq nittarsaanniarlugulusooq avatangiisinut tunuliaqutsiullugu atorniartarmagu. oqarpoq nangillunilu:
- Danskit kalaallillu radioaviisiini Connie Hedegaardip tikeraaqataanissaminik oqaasii issuarneqartut, allaannginnamik republikanerit qinigaanissaat pingaarnerutillugu oqaatsit.
- Kalaallit oqartussaasuinut pingaarnerpaaq tassaavoq naalakkersuinikkut sumut sammineq aamma sumit nunamit aggerneq pingaarnerutinnagu, kisiannili silaannaap allanngoriartornerata sorsuffiginissaata ilisimaneqarnerunissaa annertunerpaamik siammarterniassallugu, Nunanut allanut tunngasuni naalakkersuisoq Josef Motzfeldt oqarpoq.
Radioavisimit aperaarput USA-p avatangiisinut tunngatillugu isummertarnera, tikeraartoqarneratigut allanngortinneqarsinnaanersoq.
- USA-mi naalakkersuinikkut pissutsit aalajangiisarnerillu qanoq kigaatsigisumik qanorlu pisariutigisumik ingerlasarneri eqqarsaatigalugit, George Buship ukiuni arfinilinngortuni massakkut præsidentiunermi inatsisiliarisimasai imaaliallaannaq allanngortinneqarsinnaanngillat.
-Annertunerpaamik suliffissuaqarnerup tassuunakkullu silaannarmik minngersaanerup annertusiartuinnarneranit illersuisutullusooq saqqummertarsimanera inatsisiliortarsimaneralu ullormiit ullormut ukiumiillu ukiumut atorunnaarsinneqarsinnaanngilaat. Taamaammat uagutsinnut pingaarnerussaaq taamatut tikeraartoqartarnerit nunat tamat akornanni inatsisartuni sapinngisamik tamakkiinerpaamik nunat assigiinngitsut sinniisaanik tikeraartoqartarnissaq, Josef Motzfeldt oqarpoq.
Naggataagut oqaatigaa, nuannaralugu USA-p nunattalu akornanni sakkutooqarfimmut sammisuinnaat suleqatigiissutigineqanngimmata.
