Josef Motzfeldtip siunnersuutaa Naalakkersuisut ilalernartinngilaat

Isertitaqqortussuseq najoqqutaralugu akileraartitseriaatsip atuutilernissaanut naalakkersuisut periarfissaq siulleq atorlugu siunnersuusioqqullugit Inuit Ataqatigiit sinnerlugit Inatsisartuni ilaasortap Josef Motzfeldtip siunnersuutigaa, siunnersuulli Naalakkersuisunit ilalerneqanngilaq.
oktobarip 16-at 2007 15:37

Inuit kisimiittut koruuninik 400.000-init amerlanerusunik isertitallit, aappariillu koruuninik 800.000-init amerlanerusunik isertitallit, akileraarnerusalernissaat Josef Motzfeldtip siunnersuutigaa.

Aningaasat pineqartut qaavisigut isertitarineqartut akileraarutinik ilaneqartarnissaat siunnersuutigineqarpoq, akileraarutigineqartartut 10 procentinik ilaneqartarnissaat Josef Motzfeldtip siunnersuutigimmagu.

Siunnersuummut tapersersuiniannginnerminnut Naalakkersuisut assigiinngitsunik tunngavilersorput. Allaffissornermut aningaasartuuteqarnerulernissaq naatsorsuutigineqartariaqartoq oqariartuutigineqarpoq, akileraaruserinikkullu inatsisinik pisariunerusunik pilersitsinikkut nakkutilliinerulernissaq kukkunnersiuinikkullu annertunerusumik suliassaqalernissaq aarleqqutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq